वर्षाले देशभरका सडक प्रभावित, विभिन्न स्थानमा यातायात ठप्प

काठमाडौं । लगातारको वर्षाका कारण देशका विभिन्न जिल्लाका सडकखण्डमा बाढी, पहिरो र सडक भासिने समस्या देखिएपछि यातायात प्रभावित भएको छ । केही जोखिमयुक्त सडकमा रातिको समयमा सवारीसाधन सञ्चालनमा समेत रोक लगाइएको प्रहरीले जनाएको छ ।

प्रहरी प्रधानकार्यालयले आज बिहान ५ः०० बजे जारी गरेको विवरण अनुसार काभ्रेपलाञ्चोक, सिन्धुपाल्चोक, रसुवा, रुकुम पश्चिम, लमजुङ, इलाम, नुवाकोट, रोल्पा, पाल्पा र मकवानपुरका विभिन्न सडकखण्ड प्रभावित भएका छन् ।

काभ्रेपलाञ्चोकको खुर्कोट–नेपालथोक–कटुन्जेबेँसी सडकमा बाढीको जोखिमलाई ध्यानमा राख्दै साँझ ६ः०० बजेदेखि बिहान ४ः०० बजेसम्म सबै प्रकारका सवारीसाधन सञ्चालनमा रोक लगाइएको छ । बिहान ४ः०० बजेदेखि साँझ ६ः०० बजेसम्म भने यातायात सञ्चालन गर्न दिइएको छ ।

मकवानपुरको कान्ति लोकपथमा पनि राति ५ः०० बजेदेखि बिहान ५ः०० बजेसम्म सम्पूर्ण सवारीसाधन चलाउन रोक लगाइएको छ । नुवाकोटको टोखा–छहरे सडकखण्डमा अत्यावश्यक सेवाका सवारीबाहेक अन्य सार्वजनिक तथा निजी सवारीसाधनको राति १०ः०० बजेदेखि बिहान ५ः०० बजेसम्म आवागमन बन्द गरिएको छ ।

इलाम नगरपालिका–९ राजदुवालीमा हिलो जम्दा मेची राजमार्ग पूर्ण रूपमा अवरुद्ध भएको छ । उक्त क्षेत्रमा वैकल्पिक मार्ग भने उपलब्ध रहेको प्रहरीले जनाएको छ ।

सिन्धुपाल्चोकको भोटेकोशी गाउँपालिका–२ कोदारीमा इकु पहिरो तथा लिपिङ क्षेत्रमा सडक भासिएपछि अरनिको राजमार्ग पूर्ण रूपमा बन्द भएको छ । रसुवाको उत्तरगया गाउँपालिका–५ खाल्टेमा त्रिशूली नदीले सडक कटान गरेपछि त्रिशूली–मैलुङ–स्याफ्रुबेंसी सडकखण्ड पनि अवरुद्ध भएको छ । यस्तै, गोसाइँकुण्ड गाउँपालिका–२ स्याउपार्किङमा पहिरो खसेपछि पासाङल्हामु सडक बन्द भएको छ ।

रुकुम पश्चिमको आठबिसकोट नगरपालिका–६ रिजेगार्ड खोलामा पहिरो खस्दा भेरी करिडोरअन्तर्गत जाजरकोट–डोल्पा सडक पूर्ण रूपमा अवरुद्ध भएको छ । लमजुङको मर्स्याङ्दी गाउँपालिका–४ रामबजारमा पहिरो खसेपछि बेँसीसहर–मनाङ सडकखण्ड पनि ठप्प भएको छ ।

त्यस्तै, रोल्पाको माडी गाउँपालिका–६ झकलीमा रुखसहितको पहिरो खसेपछि घोराही–थवाङ–रुकुम सहिदमार्ग अवरुद्ध भएको छ । पाल्पाको तिनाउ गाउँपालिका–३ सिद्धबाबा सुरुङमार्गको पाल्पातर्फको प्रवेश बिन्दुबाट करिब एक सय मिटर उत्तरमा पहिरो खसेपछि सिद्धार्थ राजमार्ग पनि पूर्ण रूपमा बन्द भएको प्रहरीले जनाएको छ ।

वर्षाका कारण सडकमा पहिरो तथा बाढीको जोखिम अझै कायम रहेकाले यात्रुलाई अवस्था बुझेर मात्र यात्रा गर्न र आवश्यक परे वैकल्पिक मार्ग प्रयोग गर्न प्रहरीले आग्रह गरेको छ । अर्को सूचना जारी नभएसम्म रोक लगाइएका सडकमा सवारीसाधन सञ्चालन नगर्नसमेत सम्बन्धित निकायले अनुरोध गरेको छ ।