विपक्षी दलको निष्कर्षः प्रधानमन्त्री ओली तत्काल राजीनामा दिनुपर्छ

काठमाडौं । विपक्षी दलहरूको बैठकले प्रधानमन्त्री केपी शर्मा ओलीले तत्कालै राजीनामा दिनुपर्ने निष्कर्ष निकालेको छ ।

आज बिहान सिंहदरबारस्थित माओवादी केन्द्रको संसदीय दल कार्यालयमा बसेको बैठकले यस्तो निष्कर्षमा पुगेको हो । सरकारले नागरिकमाथि गरेको ‘बर्बर दमन’को विरोधस्वरूप प्रमुख विपक्षी दलका नेता पुष्पकमल दाहाल ‘प्रचण्ड’ले मंगलबार बिहान संसद्मा प्रतिनिधित्व गर्ने सबै विपक्षी दललाई बैठकमा डाकेका थिए ।

बैठकपछि माओवादी केन्द्रका उपमहासचिव वर्षमान पुनले पत्रकारलाई जानकारी दिँदै भने, “सम्पूर्ण घटनाको जिम्मेवारी प्रधानमन्त्री केपी शर्मा ओलीले लिनुपर्छ र तत्कालै राजीनामा दिनुपर्छ भन्ने निष्कर्षमा हामी पुगेका छौं ।”