समस्याग्रस्त सहकारीका सञ्चालकको लुकाइएको सम्पत्ति खोज्दै समिति, सूचना दिन सर्वसाधारणलाई आह्वान

काठमाडौं । समस्याग्रस्त सहकारी व्यवस्थापन समितिले समस्यामा परेका २३ वटा सहकारी संस्थाका सञ्चालकहरूले लुकाएको हुन सक्ने सम्पत्तिबारे जानकारी उपलब्ध गराउन सर्वसाधारणसँग आग्रह गरेको छ ।

समितिले ती सहकारीका सञ्चालकहरूको नामसहितको विवरण सार्वजनिक गर्दै उनीहरूले परिवार, आफन्त, नातागोता वा अन्य व्यक्तिको नाममा सम्पत्ति तथा रकम लुकाएको जानकारी भए सम्बन्धित निकायमा सूचना दिन अनुरोध गरेको हो ।

समितिद्वारा जारी सूचनामा सहकारीको बचत रकम वा सम्पत्ति हिनामिना गरी अन्य व्यक्तिको नाममा सम्पत्ति राखिएको वा रकम सारिएको जानकारी भए कार्यालयमा जानकारी गराउन भनिएको छ ।

यससँगै समितिले समस्याग्रस्त सहकारी संस्थाका सञ्चालकहरूलाई सहकारीको दायित्व व्यवस्थापन, ऋण असुली, सम्पत्ति तथा स्रोत–साधनको पहिचान र व्यवस्थापनमा सक्रिय भूमिका निर्वाह गर्न आग्रह गरेको छ ।

समितिले बचतकर्ताको रकम फिर्ता, दायित्व फर्छ्योट तथा नियमनसम्बन्धी कार्यलाई प्रभावकारी बनाउन सञ्चालकहरू नियमित सम्पर्कमा रही आवश्यक सहयोग गर्नुपर्ने जनाएको छ ।