समानुपातिक सांसद टुंग्याउन कांग्रेस कार्यसम्पादन समितिको बैठक बस्दै

काठमाडौं । नेपाली कांग्रेसको केन्द्रीय कार्यसम्पादन समितिको बैठक आज बस्ने भएको छ । बैठक दिउँसो १ बजे सानेपास्थित पार्टीको केन्द्रीय कार्यालयमा आयोजना हुने जनाइएको छ ।

हालै सम्पन्न निर्वाचनमा प्रतिनिधि सभाको समानुपातिक प्रणालीतर्फ प्राप्त सिटका आधारमा सांसदहरूको नाम टुंग्याउन बैठक बोलाइएको हो ।

बैठकमा निर्वाचनअघि निर्वाचन आयोगमा पेश गरिएको बन्दसूचीमा समावेश उम्मेदवारहरूमध्ये पार्टीले पाएको सिट संख्याअनुसार प्रतिनिधि सभा सदस्यहरूको अन्तिम नाम छनोट गर्ने विषयमा छलफल तथा निर्णय हुने बताइएको छ ।

पार्टी केन्द्रीय कार्यालयका कार्यवाहक मुख्य सचिव कृष्णप्रसाद दुलालले विज्ञप्ति जारी गर्दै कार्यसम्पादन समितिका सबै पदाधिकारी तथा सदस्यलाई तोकिएको समयमा बैठकमा अनिवार्य रूपमा उपस्थित हुन आग्रह गरेका छन् ।