दुर्गा प्रसाईं हाजिर जमानीमा छुटे, अनुसन्धान भने जारी

काठमाडौं । राष्ट्र, राष्ट्रियता, धर्म, संस्कृति र नागरिक बचाउ महाअभियानका संयोजक दुर्गा प्रसाईंलाई हाजिर जमानीमा रिहा गरिएको छ । माघ ५ गते पोखराबाट पक्राउ गरी काठमाडौं ल्याइएका प्रसाईंलाई अनुसन्धानको प्रक्रियामा सहकार्य गर्ने सर्तमा छाडिएको हो ।

जिल्ला सरकारी वकिल कार्यालय काठमाडौंका प्रमुख रामहरी काफ्लेले प्रसाईंलाई हाजिर जमानीमा रिहा गरिएको जानकारी दिएका छन् । उनका अनुसार अनुसन्धान भने निरन्तर जारी रहनेछ ।

प्रहरीले प्रसाईंसँग सार्वजनिक शान्ति विरुद्धको कसुरमा बयान लिएको जनाएको छ ।

यसअघि प्रसाईंले नेपाली कांग्रेसको विशेष महाधिवेशनबाट गगन थापा पक्षले निर्वाचन आयोगमा रकम बुझाएर आधिकारिकता लिएको दाबी सार्वजनिक रूपमा गरेका थिए । सो अभिव्यक्तिपछि निर्वाचन आयोगले घटनाबारे अनुसन्धान गर्न प्रहरीलाई पत्राचार गरेको थियो ।