इरानका सर्वोच्च नेता खामेनीको मृत्यु, देशभर ४० दिन शोक घोषणा

काठमाडौं । इरानले आफ्ना सर्वोच्च नेता अयातोल्लाह अली खामेनीको मृत्यु भएपछि ४० दिनको राजकीय शोक र ७ दिनको सार्वजनिक बिदा घोषणा गरेको छ । खामेनीको मृत्यु इजरायल–अमेरिकाको आक्रमणमा भएको बताइएको छ ।

खामेनीको निधनप्रति शोक व्यक्त गर्दै इरानी इस्लामिक रिभोलुसनरी गार्ड कोर्प्स (आईआरजीसी) ले देशले एक महान् नेतृत्व गुमाएको जनाएको छ । आईआरजीसीले जारी गरेको वक्तव्यमा भनिएको छ, “हामीले एक महान् नेता गुमाएका छौँ, सम्पूर्ण राष्ट्र अहिले गहिरो शोकमा छ ।”

इरानी सञ्चारमाध्यम फार्स समाचार एजेन्सी र तस्निम समाचार एजेन्सीका अनुसार उक्त आक्रमणमा खामेनी मात्र नभई उनका परिवारका अन्य सदस्यहरू पनि मारिएका छन् । घटनामा उनकी छोरी, ज्वाइँ, नातिनी तथा बुहारीको समेत ज्यान गएको बताइएको छ ।

यस घटनापछि इरानको सेनाले कडा प्रतिक्रिया जनाउँदै ‘इतिहासकै सबैभन्दा खतरनाक आक्रमण’ गर्ने चेतावनी दिएको छ । सेनाले जारी गरेको विज्ञप्तिमा कब्जा गरिएका क्षेत्रहरू र अमेरिकी अड्डाहरूलाई लक्षित गरी ठूलो सैन्य कारबाही सुरु गरिने उल्लेख गरिएको छ ।

खामेनी सन् १९८१ देखि सन् १९८९ सम्म इरानका राष्ट्रपति रहेका थिए । त्यसपछि सन् १९८९ मा उनी देशको सर्वोच्च नेता चयन भएका थिए र लामो समयसम्म इरानी राजनीतिमा प्रभावशाली भूमिकामा रहेका थिए ।