जनज्योति आधारभूत विद्यालयले शिक्षिका मगरलाई गर्‍यो सम्मानसहित विदाइ

खिजीदेम्बा । ओखलढुंगा जिल्लाको खिजीदेम्बा गाउँपालिकास्थित श्री जनज्योति आधारभूत विद्यालयले विद्यालयमा कार्यरत शिक्षिका पवित्रा माया मगरलाई सम्मानसहित विदाइ गरेको छ । सरुवा भई अर्को विद्यालयमा जाने क्रममा विद्यालयले एक कार्यक्रम आयोजना गरी उनलाई विदाइ गरेको हो ।

शिक्षिका मगर २०८० चैत २५ देखि उक्त विद्यालयमा कार्यरत रहँदै २०८० चैत २६ मा हाजिर भएकी थिइन् । उनले २०८२ पुस २७ सम्म निरन्तर रूपमा अध्यापन सेवा प्रदान गरेकी थिइन् । शिक्षण अवधिमा उनले विद्यार्थीको शैक्षिक उन्नयनसँगै विद्यालयको समग्र शैक्षिक वातावरण सुधारमा महत्वपूर्ण योगदान दिएको विद्यालयले जनाएको छ ।

समान तह तथा दरबन्दीमा सरुवा भई ओखलढुंगाकै मानेभञ्ज्याङ गाउँपालिकास्थित श्री मनोरचना आधारभूत विद्यालयमा जाने क्रममा विद्यालय परिवारले उनको योगदानको कदर गर्दै सम्मान व्यक्त गरेको हो । कार्यक्रममा विद्यालय प्रशासनले शिक्षिका मगरको सेवाप्रति धन्यवाद दिँदै आगामी कार्यकालका लागि सफलताको शुभकामना व्यक्त गर्‍यो ।

विदाइ कार्यक्रममा विद्यालयका शिक्षक–शिक्षिका, विद्यार्थी तथा अभिभावकहरूको उपस्थिति रहेको थियो । शिक्षिका मगरको सरल स्वभाव, अनुशासित अध्यापन शैली र विद्यार्थीप्रतिको समर्पणको विद्यार्थी तथा शिक्षकले खुलेर प्रशंसा गरेका थिए ।