प्रचण्डले गरे केन्द्रीय समिति भङ्ग गर्ने प्रस्ताव

काठमाडौं । नेकपा माओवादी केन्द्रले हाल कायम रहेको केन्द्रीय समिति भङ्ग गर्ने तयारी गरेको छ । आइतबार पार्टी कार्यालय पेरिसडाँडामा बसेको पदाधिकारी बैठकमा अध्यक्ष पुष्पकमल दाहाल ‘प्रचण्ड’ ले सो प्रस्ताव पेस गरेका हुन् ।

बैठकमा प्रचण्डले पार्टीलाई अझ सशक्त र गतिशील बनाउन केन्द्रीय समिति भङ्ग गरेर नयाँ संरचना तयार गर्ने आवश्यकतामाथि जोड दिएका छन् । उनले अब पार्टीलाई व्यापक पुनर्गठन गर्दै नेतृत्व, संगठन र नीतिगत आधारलाई जनतामुखी बनाउने समय आएको बताएका स्रोतको दाबी छ ।

त्यस्तै, प्रचण्डले आगामी मंसिर महिनामा विशेष महाधिवेशन आह्वान गर्ने प्रस्ताव समेत राखेका छन् । विशेष महाधिवेशनमार्फत पार्टीको भावी दिशा, संगठनात्मक स्वरूप र नीतिगत मुद्दामा गहन छलफल हुने उनको भनाइ रहेको बुझिन्छ ।

साथै, एक साताभित्र केन्द्रीय समितिको बैठक बोलाएर ‘विशेष महाधिवेशन आयोजक कमिटी’ गठन गर्ने योजना समेत बैठकमा प्रस्तुत गरिएको छ ।