विप्लव नेतृत्वको नेकपाले एकताका लागि बनायो वार्ता टोली

काठमाडौं । नेपाल कम्युनिस्ट पार्टी (नेकपा) का महासचिव नेत्रविक्रम चन्द ‘विप्लव’ले माओवादी घटक र वैचारिक समानता भएका समूहहरूसँग एकताको प्रयासलाई तीव्र बनाउँदै वार्ता टोली गठन गरेका छन् ।

पार्टीको काठमाडौंमा सम्पन्न केन्द्रीय कमिटी बैठकले एकता प्रयासलाई औपचारिक बनाउँदै माओवादी धार र विचार मिल्ने पक्षसँग वार्ता गर्ने निर्णय गरेको हो । सोही निर्णयअनुसार गठित वार्ता टोलीको संयोजक प्रवक्ता खड्गबहादुर विश्वकर्मा रहेका छन् । टोलीमा अनिल सी, शिलु सी, सुशील सी, चिरण र जितेन्द्र सी सदस्यका रूपमा छन् ।

यसैबीच, नेकपा (माओवादी केन्द्र) ले पनि विप्लव नेतृत्वको नेकपासँग एकताको सम्भावना खोतल्दै छलफल अगाडि बढाएको छ । भदौमा बसेको माओवादी केन्द्रको स्थायी समिति बैठकले एकताका लागि सकारात्मक निर्णय गरिसकेको छ ।

जेन(जि आन्दोलनपछिको राजनीतिक परिवर्तनलाई मध्यनजर गर्दै महासचिव विप्लवले माओवादी पक्षसँग शीघ्र एकता गर्ने रणनीतिमा आफूलाई अग्रसर बनाएका छन् ।

माओवादी केन्द्रका अध्यक्ष पुष्पकमल दाहाल ‘प्रचण्ड’ले समेत विप्लव समूह र माधवकुमार नेपाल नेतृत्वको नेकपा (एकीकृत समाजवादी) सँग एकताको सम्भावना पहिलो प्राथमिकतामा राखेर तयारी अघि बढाएका छन् ।

यी गतिविधिहरूले वाम शक्तिहरूबीचको पुनः एकता प्रयास नयाँ मोडमा प्रवेश गरेको संकेत दिएका छन् ।