सर्लाहीमा एम्बुलेन्सबाट ५१ किलो गाँजा बरामद, चालक पक्राउ

सर्लाही । सर्लाहीमा एम्बुलेन्समार्फत गाँजा ढुवानी भइरहेको अवस्थामा प्रहरीले ठूलो परिमाणमा लागूऔषध बरामद गरेको छ । हरिवन नगरपालिका–५ घुर्कौलीस्थित हीरालाल टोलबाट ५१ किलो गाँजा लोड गरिएको एम्बुलेन्स आइतबार बिहान नियन्त्रणमा लिइएको हो ।

जिल्ला प्रहरी कार्यालयका अनुसार नेपाल रेडक्रस सोसाइटी रामनगर बहुअर्वाको नाममा दर्ता भएको ज १ च १५५८ नम्बरको एम्बुलेन्स गोप्य सूचनाका आधारमा इलाका प्रहरी कार्यालय हरिवनको टोलीले रोकजाँच गर्ने क्रममा पक्राउ गरेको हो । एम्बुलेन्स चालक रौतहटको यमुनामाई गाउँपालिका–४ सरुअठाका ३७ वर्षीय सुरेन्द्र राय यादवलाई समेत घटनास्थलमै नियन्त्रणमा लिइएको प्रहरीले जनाएको छ ।

यता, लालबन्दी नगरपालिका–११ हिरापुरबाट पनि प्रहरीले ५२ किलो गाँजासहित एक युवालाई पक्राउ गरेको छ । सोही नगरपालिका–१४ नारायणखोलाका २५ वर्षीय गङ्गाबहादुर वाइवालाई प्रहरीले नियन्त्रणमा लिएर थप अनुसन्धान अघि बढाएको छ ।