सेवा निवृत्त आइजिपी खापुङको विदेश यात्रा रोक, उपत्यका पनि छाड्न नपाउने

काठमाडौं । भदौ २३ र २४ गतेका घटनासम्बन्धी जाँचबुझ आयोगले नेपाल प्रहरीका निवर्तमान तथा सेवा निवृत्त प्रहरी महानिरीक्षक (आइजिपी) चन्द्रकुवेर खापुङलाई विदेश जान रोक लगाउने निर्णय गरेको छ ।

आयोगको आज बसेको बैठकले खापुङलाई हाललाई देश बाहिर जान नपाउने गरी नियन्त्रणमा राख्ने निर्णय गरेको हो । साथै, आयोगको पूर्वअनुमति बिना उनले काठमाडौं उपत्यका पनि छाड्न नपाउने व्यवस्था गरिएको छ ।

आयोगका अनुसार, सो निर्णय अनुसन्धानलाई प्रभावकारी र निष्पक्ष बनाउने उद्देश्यले गरिएको हो । भदौ २३ र २४ गते भएका घटनामा तत्कालीन प्रहरी नेतृत्वको भूमिका विवादित बनेपछि खापुङमाथि आयोगको ध्यान केन्द्रित भएको हो ।

प्रहरी स्रोतका अनुसार आयोगले खापुङसँग घटनाका बिभिन्न चरणबारे लिखित र मौखिक स्पष्टीकरण माग्ने तयारी समेत गरेको छ । आवश्यक परे थप प्रमाण संकलनका लागि उनीसँग प्रत्यक्ष बयान पनि लिने बताइएको छ ।

भदौ २३ र २४ गते देशका विभिन्न ठाउँमा भएको प्रदर्शनका क्रममा सुरक्षाकर्मीको कारबाहीले सर्वसाधारणमा आक्रोश फैलिएको थियो । सोही घटनाको कारण उच्चस्तरीय छानबिनको आवश्यकता महसुस गर्दै सरकारले आयोग गठन गरेको थियो ।