सरकारले इलामलाई तीन महिनाका लागि ‘विपद् संकटग्रस्त क्षेत्र’ घोषणा गर्‍यो

काठमाडौं । हालैको भीषण वर्षा र पहिरोबाट ठूलो जनधनको क्षति बेहोरेको इलाम जिल्लालाई सरकारले तीन महिनाका लागि विपद् संकटग्रस्त क्षेत्र घोषणा गरेको छ ।

सिंहदरबारमा बिहीबार बसेको मन्त्रिपरिषद्को बैठकले इलाममा उत्पन्न परिस्थितिलाई गम्भीर मानवीय र भौतिक संकटका रूपमा व्याख्या गर्दै उक्त निर्णय गरेको हो । सरकारका प्रवक्ता तथा सञ्चार, सूचना तथा प्रविधि मन्त्री जगदीश खरेलका अनुसार, “स्थानीय प्रशासनको प्रतिवेदन र गृह मन्त्रालयको सिफारिसपछि मन्त्रिपरिषद्ले तत्कालका लागि संकट घोषणा गर्ने निर्णय लिएको हो ।”

लगातार परिरहेको वर्षा र त्यसपछि आएको बाढी–पहिरोले इलामका दर्जनौँ बस्ती विस्थापित भएका छन् । सडक, पुल, विद्यालय र स्वास्थ्य संस्था नष्ट हुँदा जनजीवन पूर्ण रूपमा अस्तव्यस्त बनेको छ । स्थानीय प्रशासनले अहिलेसम्म ३९ जनाको मृत्यु, दर्जनौँ हराइरहेका र सयौँ घरधुरी उच्च जोखिममा रहेको विवरण सार्वजनिक गरेको छ ।

विपद् संकटग्रस्त क्षेत्र घोषणा भएपछि अब इलाममा राहत, उद्धार र पुनर्निर्माणका लागि केन्द्र र प्रदेश दुवै तहका स्रोत परिचालन गर्न सहज हुने सरकारको भनाइ छ । मन्त्री खरेलले भने, “संकटको अवस्थालाई नियन्त्रणमा लिन र पीडित नागरिकको जीवन रक्षा गर्न सरकारले सबै संयन्त्र तत्काल सक्रिय गरेको छ ।”

स्थानीय प्रतिनिधिहरूले भने केन्द्र सरकारलाई थप राहत सामग्री, स्थायी बासस्थान पुनर्निर्माण योजना र मनोवैज्ञानिक सहायता कार्यक्रम तत्काल सुरु गर्न आग्रह गरेका छन् ।
इलामका विभिन्न क्षेत्र (देउमाई, माङसेबुङ, चुलाचुली र इलाम नगरपालिका) अहिले पनि असुरक्षित क्षेत्रको सूचीमा रहेका छन् ।