नुम्बुर हिमालको पहिलो सफल आरोहण, तीन विदेशी आरोहीले लेखे नयाँ इतिहास

सोलुखुम्बु । सोलुखुम्बुमा अवस्थित ६ हजार ९५८ मिटर उचाइको नुम्बुर हिमालको चुचुरोमा पहिलोपटक मानव पाइला पुगेको छ । पर्यटन विभागले आरोहण खुला गरेको एक वर्षपछि सेभेन समिट ट्रेकमार्फत तीन विदेशी आरोहीले हिमालमा सफल आरोहण गरेका हुन् ।

इटालीका हर्भ, जर्मनीका फेलिक्स र पोल्याण्डका आडमले १५ घण्टाको कठिन आरोहणपछि आइतबार बिहान नुम्बुरको शिखरमा पुग्न सफल भएका हुन् । विभागका अनुसार यो आरोहण ऐतिहासिक उपलब्धिका रूपमा दर्ता भएको छ ।

पर्यटन व्यवसायी फुछिरी शेर्पाका अनुसार नुम्बुरको यो पहिलो सफल आरोहणले हिमालको इतिहासमा नयाँ अध्याय सुरु गरेको छ । “अब नुम्बुर पनि विश्व आरोहीहरूको गन्तव्य बन्नेछ,” उनले भने ।

सोलुदुधकुण्ड नगरपालिका–१ मा पर्ने नुम्बुर हिमाललाई स्थानीयहरूले दुधकुण्ड तालको शीरको रूपमा मान्ने गर्छन् । नगर प्रमुख नाम्गेल जाङ्बु शेर्पाले नुम्बुरको सफल आरोहणले यस क्षेत्रको पर्यटनमा नयाँ ढोका खोलेको बताए ।

सफल आरोही टोलीलाई वडाध्यक्ष छोङ्बा शेर्पा र पर्यटन व्यवसायी फुछिरी शेर्पालगायत स्थानीयले संयुक्त रूपमा स्वागत गरेका थिए ।