दिल्ली विमानस्थलमा चकित पार्ने घटनाः ल्यान्डिङ गियरमा लुकेर १३ वर्षीय अफगानी बालक भारतमा

काठमाडौं । भारतको दिल्लीस्थित इन्दिरा गान्धी अन्तर्राष्ट्रिय विमानस्थलमा एक अविश्वसनीय घटना सार्वजनिक भएको छ । अफगानिस्तानको कुन्दुज शहरका १३ वर्षीय किशोर काबुलबाट दिल्ली आउने विमानको ल्यान्डिङ गियरमा लुकेर भारत पुगेका छन् ।

विमान अवतरणपछि पत्ता लाग्यो
सेप्टेम्बर २१ बिहान करिब ११ः१० बजे केएएम एयरलाइन्सको फ्लाइट दिल्लीमा अवतरण भएपछि विमान वरिपरि घुमिरहेको बालक देखिएपछि सुरक्षा कर्मचारीले नियन्त्रणमा लिएका थिए । सोधपुछमा उनले टिकटबिनै काबुल विमानस्थलबाट यात्रुहरूको पछिपछि रनवे पुगेको र विमानको पाङ्ग्रा नजिकको साँघुरो ‘व्हील वेल’ मा लुकेर यात्रा गरेको बताएका छन् ।

जाँचका क्रममा एयरलाइन्सको सुरक्षा टोलीले ल्यान्डिङ गियर नजिकैबाट रातो रंगको सानो स्पिकर पनि फेला पारेको थियो ।

९४ मिनेटको खतरनाक यात्रा
‘द न्यू इन्डियन एक्सप्रेस’का अनुसार, काबुलदेखि दिल्लीसम्मको यात्रा ९४ मिनेट लामो थियो । यस अवधिभर किशोर विमानको पछाडिको पाङ्ग्रा भागमा थुनिएर बसेका थिए ।
उक्त फ्लाइट भारतीय समयअनुसार बिहान ८ः४६ बजे काबुलबाट उडेको र १०ः२० बजे दिल्लीमा अवतरण गरेको थियो ।

उच्च जोखिमपूर्ण तरिकाले यात्रा
एभिएसन विज्ञका अनुसार, ल्यान्डिङ गियरमा यात्रा गर्नु लगभग असम्भवजस्तै हुन्छ । उचाइमा पुगेपछि अक्सिजनको कमी, हाडनिस्कने जाडो तापक्रम र पाङ्ग्राको चपेटामा पर्न सक्ने जोखिम अत्यन्तै उच्च हुन्छ ।

क्याप्टेन मोहन रंगनाथनका अनुसार, टेकअफपछि पाङ्ग्रा भित्रिँदा त्यो भाग पूर्ण रूपमा बन्द हुन्छ, जसले सास फेर्न झनै कठिन बनाउँछ ।

भारतले फर्कायो
भारतीय अधिकारीहरूले बालक नाबालक भएको कारण कानुनी कारबाही नगर्ने निर्णय लिएका छन् । सम्पूर्ण प्रक्रिया पूरा गरेपछि उनलाई सोही दिन दिउँसो फर्कने फ्लाइटमार्फत पुनः काबुल पठाइएको भारतीय सञ्चारमाध्यमहरूले जनाएका छन् ।