चाडपर्वमा सुरक्षित यात्रा गर्न मन्त्री घिसिङको आग्रह

काठमाडौं । चाडपर्वका लागि यात्रुहरूको चाप बढिरहेका बेला भौतिक पूर्वाधार तथा यातायात मन्त्री कुलमान घिसिङले चालक र यात्रुलाई यात्रा सुरक्षित बनाउन विभिन्न सुझाव दिएका छन् । उनले बुधबार बिहान सामाजिक सञ्जालमार्फत चालकलाई चार र यात्रुलाई चार सन्देश दिएका हुन् ।

“तपाईंको जीवन र तपाईंको परिवार राष्ट्रको अमूल्य सम्पत्ति हो । त्यसैले यो पर्वमा घर फर्किँदा वा यात्रा गर्दा रमाइलो त पक्का गर्नुहोस्, तर हतार नगरी, सजग भई, नियम पालना गरेर यात्रा गर्नुहोस्,” मन्त्री घिसिङले अनुरोध गरेका छन् ।

चालक साथीहरूलाई अनुरोध गर्दै उनले लेखेका छन्ः
— गति नियन्त्रणमा राख्नुहोस्,
— मदिरा सेवनपश्चात् कुनै हालतमा सवारी नचलाउनुहोस्,
— विश्राम लिएर मात्र लामो यात्रामा निस्कनुहोस्,
— यात्रुलाई आफ्नो परिवारझैँ सम्झेर सुरक्षित गन्तव्यसम्म पुर्‍याउनुहोस् ।

त्यस्तै यात्रु दाजुभाइ तथा दिदीबहिनीहरूलाई अनुरोध गर्दै थप लेखेका छन्ः
— क्षमताभन्दा बढी सवारीमा चढेर आफ्नो जीवनलाई जोखिममा नपारौं,
— चालकलाई दबाब नदिई शान्त र सुरक्षित यात्रा गर्न प्रोत्साहन गरौं,
— यात्राको क्रममा आवश्यक सुरक्षा र सावधानी अपनाऔं ।
— यस दशैंमा हाम्रो उद्देश्य केवल गन्तव्यमा पुग्नु मात्र होइन, सुरक्षित र खुसीसाथ पुग्नु पनि हो ।

मन्त्री घिसिङले सडक सुरक्षा नै जीवन सुरक्षा हो, जीवन सुरक्षा नै परिवारको खुशी हो, र परिवारको खुशी नै हाम्रो राष्ट्रको शक्ति हो भनेका छन् । साथै उनले यहाँहरू सम्पूर्णलाई दसैँको हार्दिक शुभकामना भनेका छन् ।

यातायातसँगै सहरी विकास र ऊर्जा, जलस्रोत तथा सिँचाइ मन्त्रालय पनि अहिले घिसिङकै जिम्मामा छन् ।