माओवादी केन्द्रद्वारा मध्यपहाडी लोकमार्ग अभियान पुनः सुरु

काठमाडौं । नेकपा (माओवादी केन्द्र) ले स्थगित गरिएको मध्यपहाडी लोकमार्ग (पुष्पलाल लोकमार्ग) केन्द्रित अभियान पुनः सुरु गरेको छ । बर्खाको कारण रोकिएको अभियान शनिबार पोखराबाट औपचारिक रूपमा पुनः प्रारम्भ गरिएको हो ।

पोखराको रूपा गाउँपालिका–१ स्यास्त्रीस्थित सहिद पार्कमा आयोजित कार्यक्रमबाट अभियानको पुनः सुरु गरिएको हो । कार्यक्रम सहिद चन्द्रप्रसाद खनालको सालिकमा माल्यार्पण गरेर प्रारम्भ गरिएको थियो । २०५८ सालमा तत्कालीन राज्य पक्षद्वारा हत्या गरिएका खनाल शिक्षक समेत थिए । उनका जेठो छोरा प्रदीप खनाल २०६० सालदेखि बेपत्ता छन् ।

सहिद खनालकी श्रीमती राधिका खनाल, छोरी सर्मिला खनाल र छोरा सुदीप खनाल सबै कार्यक्रममा सहभागी थिए । सर्मिला र सुदीप माओवादी केन्द्रमा राजनीतिक रूपमा सक्रिय छन् ।

अध्यक्ष पुष्पकमल दाहाल ‘प्रचण्ड’ ले कार्यक्रममा बोल्दै ‘जनयुद्ध’लाई ऐतिहासिक क्रान्ति भन्दै सहिदहरूको बलिदानकै कारण गणतन्त्र र संविधान सम्भव भएको बताए । उनले आफूले पहिलो कार्यकालमा नै जनयुद्धका सहिदलाई राष्ट्रिय सहिद घोषणा गर्ने प्रयास गरेको तर तेस्रो कार्यकालमा मात्रै त्यसलाई पूर्णता दिन सफल भएको बताए ।

प्रचण्डले सत्य निरूपण तथा मेलमिलाप आयोगले न्यायका लागि काम गरिरहेको उल्लेख गर्दै जनतासँगको सम्बन्ध अझ बलियो बनाउन पार्टीले विभिन्न अभियानहरू सञ्चालन गरिरहेको जानकारी दिए ।

साउन १६ र १७ गते बसेको माओवादी केन्द्रको स्थायी समिति बैठकको निर्णयअनुसार, भदौ २१ गतेदेखि बाँकी जिल्लाहरूमा पनि यो अभियान सञ्चालन हुने तय भएको छ ।

अध्यक्ष प्रचण्ड शनिबार साँझ लमजुङको करापुटार, मध्यनेपाल नगरपालिकामा पुगिसकेका छन् । अभियान अन्तर्गत उनी विभिन्न जिल्लामा सहभागी हुँदै जनसंवाद कार्यक्रमहरूमा पनि सहभागी हुनेछन् ।