लगातार वर्षासँगै देशभर बाढीको जोखिम, ५१ जिल्लाका बासिन्दालाई सतर्क रहन सुझाव

काठमाडौं । मनसुन सक्रिय भई निरन्तर वर्षा भइरहेकाले देशभर बाढीको जोखिम बढेको बाढी पूर्वानुमान महाशाखाले जनाएको छ ।

आज बिहानको मापनअनुसार कोसी, नारायणी, बागमती, कर्णाली, महाकालीका साथै तिनका सहायक नदीहरू कन्काई, कमला, पूर्वी राप्ती, पश्चिम राप्ती र बबईमा बहाव अहिले सतर्कता तहभन्दा तल भए पनि निकट भविष्यमा बढ्ने सम्भावना रहेको छ ।

दोलखा, सिन्धुपाल्चोक, काभ्रेपलाञ्चोक, काठमाडौं, ललितपुर, भक्तपुर, लमजुङ, कास्की, पर्वत, बाग्लुङ, म्याग्दी, रुकुमपूर्व, रुकुमपश्चिम, जाजरकोट, अछाम, डोटी, डडेलधुरा, बैतडी, दार्चुला, बझाङ, बाजुरा, बर्दिया, कैलाली, कञ्चनपुर र आसपासका जिल्लामा बहने ससाना नदीहरूको बहाव उल्लेख्य बढ्ने तथा आकस्मिक बाढी आउने उच्च जोखिम रहेको महाशाखाले चेतावनी दिएको छ ।

त्यस्तै इलाम, झापा, ताप्लेजुङ, तेह्रथुम, रामेछाप, सिन्धुली, मकवानपुर, धादिङ, नुवाकोट, गोरखा, स्याङ्जा, तनहुँ, गुल्मी, अर्घाखाँची, पाल्पा, प्युठान, नवलपरासीपूर्व, नवलपरासीपश्चिम, दाङ, सल्यान, सुर्खेत, बाँके, जुम्ला, कालीकोट, डोल्पा, मुगु, हुम्ला र आसपासका जिल्लामा पनि ससाना नदीहरूको बहाव बढ्ने र आकस्मिक बाढीको मध्यम जोखिम हुने अनुमान गरिएको छ ।

कुल ५१ जिल्लाका बासिन्दालाई बाढीबाट सतर्क रहन बाढी पूर्वानुमान महाशाखाले सुझाव दिएको छ ।