लगातारको वर्षाले पहिरोः अरनिको र मध्यपहाडी राजमार्ग पूर्णरूपमा ठप्प

काठमाडौं । देशका दुई महत्वपूर्ण राजमार्गहरू(अरनिको राजमार्ग र मध्यपहाडी लोकमार्ग) लगातारको वर्षापछि खसेको पहिरोका कारण पूर्णरूपमा अवरुद्ध भएका छन् । उक्त राजमार्ग अवरुद्ध हुँदा सुदूर पहाडदेखि राजधानी जोड्ने यातायात सम्पर्कमा अवरोध सिर्जना भएको छ ।

सिन्धुपाल्चोकको भोटेकोशी गाउँपालिका–२ कोदारीमा खसेको ठूलो पहिरोले अरनिको राजमार्ग पूर्णरूपमा बन्द भएको जिल्ला प्रहरी कार्यालय सिन्धुपाल्चोकले जनाएको छ । माथिबाट खसेको पहिरोले सडक पूर्णरूपमा पुरिएपछि त्यस क्षेत्रको सवारी सञ्चालन एकाएक ठप्प भएको हो ।

यसैगरी, जाजरकोटको छेडागाड नगरपालिका–३ अन्तर्गत दंखेरी भिर, गिट्टिखोलास्थित खण्डमा मध्यपहाडी लोकमार्गसमेत पहिरोले बन्द भएको छ । लगातार झरिरहेकै वर्षाका कारण पहिरो हटाउने प्रयासमा कठिनाइ भइरहेको छ । यद्यपि, बाटो खुलाउने कार्यका लागि डोजर परिचालन गरिएको प्रहरी स्रोतले जनाएको छ ।

यात्रु र स्थानीयवासी प्रभावित
सडक अवरुद्ध भएपछि यात्रुहरू बीच बाटोमै अलपत्र परेका छन् । लामो दूरीको यात्रामा निस्किएका सर्वसाधारणलाई बीच बाटोमै रोक्नुपरेको छ भने दैनिक उपभोग्य वस्तुहरूको आपूर्ति समेत प्रभावित हुन थालेको छ । स्थानीयवासीहरू विद्यालय, स्वास्थ्य सेवा र बजार आवतजावतमा समेत समस्या खेपिरहेका छन् ।

स्थानीय निकाय र सुरक्षाकर्मी खटिए
प्रभावित क्षेत्रहरूमा स्थानीय तह, सुरक्षाकर्मी र प्राविधिक टोली डोजरसहित परिचालित छन् । यथासक्य छिटो सडक खुलाउन प्रयास भइरहेको भए पनि अविरल वर्षाले काममा अवरोध पुर्‍याइरहेको जनाइएको छ ।

यस वर्ष मनसुन सक्रिय भएसँगै पहिरोका घटनाहरू देशभरि बढिरहेका छन् । भौगोलिक हिसाबले पहाडी क्षेत्रहरू बढी संवेदनशील भएकाले जोखिम अझै बढ्न सक्ने पूर्वानुमान गरिएको छ ।