‘मरेको सिनो’ प्रकरणः झाँक्रीलाई तीन दिने लिखित जवाफ माग

काठमाडौं । नेकपा (एकीकृत समाजवादी) भित्रको असन्तोष अब औपचारिक रूपमा अनुशासन कारबाहीको चरणमा पुगेको छ । स्थायी कमिटी सदस्य रामकुमारी झाँक्रीले शनिबार लुम्बिनीमा दिएको तीखो सार्वजनिक अभिव्यक्तिपछि पार्टी अनुशासन आयोगले उनलाई तीनदिने स्पष्टीकरण पठाएको हो । पार्टी कार्यालयका सचिव सोमप्रसाद पाण्डेले ‘जे कुरा बोल्नुभयो, त्यसको लिखित कारण पेश गर्नुस्’ भन्दै पत्रबारे पुष्टि गरेका छन् ।

झाँक्रीले अध्यक्ष माधवकुमार नेपालमाथि लागेका भ्रष्टाचार मुद्दा र नेतृत्वको ‘मरेको सिनो काँधमा बोकेर हिँड्न सकिँदैन’ जस्ता टिप्पणीसहित अर्ली महाधिवेशन माग गरिन् ।

भाषण सार्वजनिक भएपछि पोलिटब्युरो सदस्य सुदेश पराजुलीले उनलाई ‘विक्षिप्त मानसिकताको पराकाष्ठा’ भने, पार्टी महासचिव घनश्याम भुसालले कार्यकर्तालाई अध्यक्षविरुद्ध एक शब्द पनि नबोल्न परिपत्र जारी गरिदिए ।

अनुशासन आयोगले पठाएको पत्रमा झाँक्रीलाई असार २० भित्रमा जवाफ नआए पार्टी विधानअनुसार कारबाही प्रक्रिया अघि बढ्ने उल्लेख छ ।

पूर्वप्रधानमन्त्री नेपाल नेतृत्वको मन्त्रिपरिषद्ले २०६७ मा पतञ्जलि योगपीठलाई हदबन्दी छुटमा जग्गा बिक्री गर्न दिएको, त्यसपछि सोही जग्गा पुनः बेचेको अभियोगमा सीआईएएले २२ जेठमा विशेष अदालतमा मुद्दा दायर गरेको थियो  । अदालतले नेपालसहित ९३ आरोपितलाई जनही ३५ लाख धरौटीमा रिहा गर्न आदेश दिएपछि पार्टी भित्र ‘नेतृत्व संकट’ बहस चर्किएको हो ।

तीन वर्षअघि एमाले अलग्गिएर गठन भएको एकीकृत समाजवादीमा झाँक्रीले नै नेपाललाई निर्वाचन आयोग लगेर पार्टी दर्ता गराएकी थिइन् । तर मन्त्रीबाट समयमै फिर्ता गरेको गुनासो र पछिल्ला चयन प्रक्रियामा ‘पावर सेयर’ नपाएको असन्तुष्टि अहिले विस्फोट भएको पार्टी स्रोत बताउँछन् ।

गत वर्षको महाधिवेशनपछि पदाधिकारी निर्वाचन हुँदा झाँक्री उपाध्यक्ष पदमा पराजित भएकी थिइन् । त्यसयता उनले ‘सके एमाले फर्कने, नसके आफ्नै लाइन बनाउन’ खोजेको भन्दै नेपाल समूह सतर्क बनेको थियो ।