नेता महेश बस्नेतमाथि ‘प्रतीकात्मक आक्रमण’, दुई युवा पक्राउ

विराटनगर । नेकपा (एमाले)का नेता तथा पूर्वमन्त्री महेश बस्नेतमाथि विराटनगर विमानस्थलनजिक जेनजी समूहका युवाहरूले प्रतीकात्मक आक्रमणको प्रयास गरेका छन् । युवा संघको जनजागरण अभियानका लागि बस्नेत आज बिहान श्री एयरको १०ः५० बजेको उडानमार्फत विराटनगर अवतरण गर्नेबित्तिकै उनीविरुद्ध दुर्व्यवहार गरिएको हो ।

विमानस्थलको गेट नजिक बस्नेत, भानुभक्त आचार्यलगायत नेता सवार गाडी गुडिरहेको बेलामा दुई युवाले रातो मसी तथा बेलुनमा राखिएको रङ प्रहार गरेका थिए । घटनास्थलमा नै नियन्त्रणमा लिइएका युवाहरूले एमाले नेताहरू जेनजी आन्दोलनविरुद्ध सक्रिय भएको आरोप लगाउँदै ‘प्रतीकात्मक चेतावनी’ दिएको दाबी गरे ।

रातो मसी प्रहार गर्नेहरू विराटनगर–२ का १९ वर्षीय अर्पित कुँवर र विराटनगर–१ का २५ वर्षीय सञ्जोग गौतम रहेको प्रहरीले जनाएको छ । दुवै जनालाई नियन्त्रणमा लिएर अनुसन्धान सुरु गरिएको प्रहरीले उल्लेख गरेको छ ।

जेनजी समूहका अगुवा भावना राउतले बस्नेतमाथि रङ प्रहार भएको पुष्टि गर्दै, यो कार्य ‘असन्तुष्टिको संकेत’ मात्र रहेको बताइन् । उनका अनुसार, आन्दोलन न्यूनतम प्रतीकात्मक विरोधमार्फत पनि सन्देश दिन सक्षम रहेको छ ।

जिल्ला प्रहरी कार्यालय मोरङकी प्रवक्ता डीएसपी कोपिला चुँडालले घटनालाई आक्रमणको प्रयासका रूपमा लिएको बताइन् । उनका अनुसार, नेताहरूको स्कर्टिङ गरिएको भए पनि आकस्मिक रूपमा भएको घटनाले स्थानीय सुरक्षातन्त्र थप सतर्क बन्नुपर्ने देखिएको छ । उनले बस्नेत सकुशल रहेको र घटनास्थलमा तत्कालै नियन्त्रण लिएर अवस्था सामान्य बनाइएको जानकारी दिइन् ।

जेनजी आन्दोलन र एमालेबीच पछिल्ला दिनमा घर्षण बढ्दै गइरहेका बेला बस्नेतमाथिको यो घटना राजनीतिक वातावरण झनै तात्ने संकेतका रूपमा हेरिएको छ । बाराबाट सुरु भएको द्वन्द्व, ज्ञापनपत्र विवाद र लगातार भइरहेका भिडन्तमाझ एमाले नेता लक्षित विरोध बढ्नुले प्रदेश १ मा समेत जेनजी समूहको सक्रियता तीव्र हुँदै गएको विश्लेषकहरूको भनाइ छ ।

यसले आगामी दिनमा राजनीतिक तनाव थप चर्कन सक्ने संकेत दिएको सुरक्षा स्रोतहरूले बताइरहेका छन् ।