विदेश यात्रामा हुने अनियमितता रोक्न अध्यागमन विभागको सात बुँदे निर्देशन

काठमाडौं । अध्यागमन विभागले विदेश यात्रा प्रक्रियामा हुने अनियमितता, दलाली, टिकट ओभरबुकिङ र ठगीजस्ता गतिविधि रोक्न कडा निर्देशन जारी गरेको छ । विभागले आइतबार पत्रकार सम्मेलनमार्फत विमान कम्पनीदेखि ट्राभल एजेन्सी, स्थानीय प्रशासन र अन्य सरोकारवालाहरूलाई सातवटा बुँदामा विशेष ध्यान दिन आग्रह गरेको छ ।

विमान कम्पनीका लागि निर्देश

विभागले विमान कम्पनीहरूलाई यात्रुको सुरक्षा, राहदानी, भिसा र टिकटसम्बन्धी अध्यागमन प्रक्रियामा अनावश्यक दबाब नदिन निर्देशन दिएको छ । ओभरबुकिङ, टिकट काटेर पनि यात्रुलाई चढ्न नदिने, वा अन्तिम समयमा यात्रु अफलोड गर्ने गतिविधि पूर्णरूपमा बन्द गर्न भनिएको छ। टिकट वा चेक–इनमा समस्या आएमा तत्काल विभागलाई जानकारी दिनुपर्ने पनि उल्लेख छ ।

स्थानीय प्रशासनको जिम्मेवारी

विशेष विदेश यात्रा गर्न चाहने नागरिकहरूको विवरण संकलन गरी विभागमा पठाउन स्थानीय प्रशासनलाई अनुरोध गरिएको छ । शंकास्पद गतिविधि गर्ने व्यक्तिको विवरण तुरुन्त उपलब्ध गराउने व्यवस्था पनि आवश्यक छ ।

सञ्चारमाध्यमको भूमिका

सञ्चारमाध्यममार्फत् विदेश यात्रासम्बन्धी अनियमितता र ठगीबारे नागरिकलाई सचेत गराउन र सही जानकारी प्रवाह गर्न विभागले आग्रह गरेको छ।

कूटनीतिक नियोगको निर्देशन

कूटनीतिक नियोगहरूले आफ्नो कार्यक्षेत्र भित्र रहेका नेपालीहरूको यात्रा, सुरक्षा र काममा विशेष ध्यान दिनुपर्ने र नियमित रूपमा विभागमा रिपोर्ट पठाउनुपर्ने भनिएको छ ।

ट्राभल एजेन्सी र टुर कम्पनीलाई चेतावनी

पर्यटक भिसामा विदेश पठाउने क्रममा हुने ठगी, जबर्जस्ती टिकट बिक्री र ओभरबुकिङ जस्ता गतिविधि रोक्न कम्पनीहरूलाई चेतावनी दिइएको छ । यात्रु अफलोड गर्ने, भ्रामक योजना ल्याउने वा उडान भइसकेपछि मात्र टिकट वितरण गर्ने कार्य तत्काल बन्द गर्न भनिएको छ ।

मुद्रा सटही गर्ने संस्थाको नियन्त्रण

विदेश पठाउने नाममा हुने गैरकानुनी सटही र अवैध कारोबार रोक्न र प्रमाणित कारोबार मात्र गर्न निर्देशन दिइएको छ ।

यात्रुको सुरक्षा सुनिश्चित गर्ने

अध्यागमन विभागले यात्रु फसाउने, दलालको सिकार बनाउने, होटलमा थुन्ने वा जबर्जस्ती टिकट बेच्ने घटना रोक्न सुरक्षासम्बन्धी संयन्त्रलाई सतर्क रहन अनुरोध गरेको छ । शंकास्पद गतिविधि देखिएमा तुरुन्तै विभाग वा सम्बन्धित निकायलाई जानकारी दिन पनि भनिएको छ ।

साथै, विभागले नागरिक एपमार्फत् अन्तिम तयारी नगरेसम्म विदेश यात्रा नगर्न समेत चेतावनी जारी गरेको छ । सम्पर्कका लागि विभिन्न अधिकृतहरूको फोन नम्बर समेत सार्वजनिक गरिएको छ ।