प्रतिनिधिसभा निर्वाचनका लागि दल दर्ता १०८ पुग्यो, नयाँ दलको चाप बढ्दो

काठमान्डु । फागुन २१ गते तय भएको प्रतिनिधिसभा निर्वाचनमा प्रतिस्पर्धा गर्न इच्छुक दलहरूको संख्या बढ्दै गएको छ । निर्वाचन आयोगका प्रवक्ता नारायणप्रसाद भट्टराईका अनुसार बिहीबार साँझसम्म निर्वाचन प्रयोजनका लागि दर्ता पुगेका दलहरू १०८ पुगेका छन् ।

निर्वाचन प्रयोजनका लागि दल दर्ताको समय आइतबारसम्म बढाइएसँगै यसबीचमा थप दलहरू दर्ता हुन सक्ने आयोगको अनुमान छ । हाल १६ दल दर्ता प्रक्रियामै रहेका छन् । तीमध्ये कुनैले पनि अधिकारिता पाएपछि निर्वाचन प्रयोजनका लागि अलग्गै दर्ता गर्न सक्नेछन् ।

२०७९ मंसिर ४ मा सम्पन्न प्रतिनिधिसभा चुनावमा ८४ दल सहभागी रहेका थिए । त्यसको तुलनामा यसपटक सहभागी हुन चाहने दलको संख्या उल्लेख्य रूपमा बढेको छ, जसले राजनीतिक सक्रियता र वृहत्तर प्रतिनिधित्वको संकेत गर्छ ।

उता, निर्वाचन आयोगमा दर्ता भइसकेका दलहरूको संख्या भने १३९ पुगेको छ । बिहीबार माधवप्रसाद खतिवडाको नागरिक बचाउ दल नेपाल र प्रकाश खड्काको नेपाल जनसेवा पार्टी दर्ता भएका छन् ।

बुधबार सबिन सिग्देलको प्रगतिशील नागरिक पार्टी, दीपककुमार साहको सर्वोदयो पार्टी र सर्वेन्द्र खनालको समुन्नत नेपाल पार्टी समेत दर्ता भएसँगै जेनजी आन्दोलनपछि मात्रै दर्ता भएका नयाँ दलहरूको संख्या २३ पुगेको छ ।