दशरथ रंगशालामा सुकुम्बासीको भीड: एक हजारभन्दा बढी परिवारले गरे नाम दर्ता

काठमाडौं । काठमाडौंको दशरथ रंगशाला परिसर मंगलबार मध्याह्नसम्म सुकुम्बासी परिवारहरूको भीडले भरिएको छ । हालसम्म १ हजार ७८ भन्दा बढी परिवारले आफूलाई सुकुम्बासीका रूपमा दर्ता गराइसकेका छन् । सरकारद्वारा विभिन्न स्थानका बस्ती हटाएपछि विस्थापित भएका परिवारहरू अहिले सुरक्षित आश्रय र पहिचानका लागि यहाँ जम्मा भइरहेका छन् ।

विशेषगरी थापाथली, सिनामंगल, गैरीगाउँ, मनोहरालगायतका क्षेत्रका बस्तीमा सुरक्षाकर्मी परिचालन गरी हटाइएपछि त्रासमा परेका सुकुम्बासीहरू सम्पर्कमा आउने क्रम तीव्र बनेको हो । आइतबारदेखि नै आउनेको संख्या उल्लेखनीय रूपमा बढ्दै गएको र अझै पनि नयाँ परिवारहरू आउने क्रम जारी रहेको सम्बद्ध अधिकारीहरूले जनाएका छन् ।

दर्ता गरिएका परिवारहरूमा औसत चार सदस्य रहेको अनुमान गरिएको छ । यसअनुसार हालसम्म ४ हजारभन्दा बढी व्यक्तिको विवरण संकलन भइसकेको छ, जसमध्ये करिब १५ सय बालबालिका रहेका छन् । यसले विस्थापनको असर सबैभन्दा बढी बालबालिकामा परेको देखाउँछ ।

सरकारले अस्थायी राहतका लागि रंगशालामै हेल्प डेस्क स्थापना गरेको छ, जहाँ बसोबास र खाद्य व्यवस्थापन गर्न नसक्ने परिवारहरूको प्राथमिक विवरण संकलन भइरहेको छ । त्यसपछि उनीहरूलाई विभिन्न पाँचवटा ‘होल्डिङ सेन्टर’मा स्थानान्तरण गर्ने व्यवस्था गरिएको छ ।

यस कार्यमा बागमती सभ्यता एकीकृत विकास समिति र उपत्यका विकास प्राधिकरणले सक्रिय भूमिका निर्वाह गरिरहेका छन् । रंगशालाको पश्चिमतर्फ दुवै निकायले छुट्टाछुट्टै डेस्क राखेर दर्ता प्रक्रिया सञ्चालन गरिरहेका छन् ।

त्यसैगरी, स्वास्थ्य परीक्षण र खाद्य वितरणको काम पनि रंगशालामै भइरहेको छ । यसको समन्वय काठमाडौं महानगरपालिका ले गरिरहेको छ, जसले विस्थापित परिवारहरूलाई आधारभूत सेवा उपलब्ध गराउने प्रयास गरिरहेको छ ।

दर्ता प्रक्रिया पूरा गरेपछि सुकुम्बासीहरूलाई कीर्तिपुरस्थित होल्डिङ सेन्टरका साथै माछापोखरी र नयाँ बसपार्क आसपासका होटल तथा लजहरूमा अस्थायी रूपमा राख्ने व्यवस्था मिलाइएको छ । सरकारले दीर्घकालीन समाधानको खोजी गरिरहे पनि तत्काल राहत र व्यवस्थापन मुख्य चुनौतीका रूपमा देखिएको छ ।