काठमाडौंमा चिनियाँ परम्परागत चिकित्सा प्रवर्द्धनमूलक कार्यक्रम सम्पन्न, नेपाल–चीन सहकार्य बलियो बनाउने विश्वास

काठमाडौं । चिनियाँ परम्परागत चिकित्सा प्रणाली (Traditional Chinese Medicine–TCM) को प्रवर्द्धन तथा सहकार्य विस्तार गर्न काठमाडौंको रेडिसन होटलमा विशेष कार्यक्रम सम्पन्न भएको छ । चीन सरकारको सहकार्यमा आयोजित कार्यक्रममा पूर्व अर्थमन्त्री जनार्दन शर्मा प्रमुख अतिथि रहेका थिए ।

पूर्वमन्त्री शर्माले कार्यक्रमलाई सम्बोधन गर्दै भने, ‘नेपाल जस्तो भौगोलिक विविधता भएको मुलुकमा वैकल्पिक चिकित्सा प्रणालीले दूरदराजका जनतासम्म स्वास्थ्य सेवा पु¥याउन ठूलो भूमिका खेल्न सक्छ। चिनियाँ चिकित्सा प्रणालीको समृद्ध इतिहासबाट नेपालले धेरै सिक्ने अवसर पाउनेछ ।’

कार्यक्रममा TCM को विकासक्रम, आधुनिक जीवनशैलीसँगको अनुकूलता र नेपाल–चीन सम्बन्धमा यसको योगदानबारे गहन छलफल गरिएको थियो । चीनबाट आएको विशेषज्ञ टोलीले एक्युपञ्चर, हर्बल औषधि, तुना मसाज र ची गोंग विधिहरूको जीवन्त प्रस्तुति दिएका थिए । साथै, उनीहरूले नेपाली स्वास्थ्यकर्मीहरूलाई प्रशिक्षण दिने योजना रहेको जानकारी गराए ।

स्वास्थ्य मन्त्रालयका प्रतिनिधिले नेपालमा वैकल्पिक चिकित्सा प्रणाली विस्तारका लागि चीनसँगको सहकार्यलाई सकारात्मक कदमको रूपमा ब्याख्या गरे । ‘ग्रामीण क्षेत्रमा पहुँच सहज बनाउन यस्ता विधि प्रभावकारी बन्न सक्छन्,’ उनले बताए।

कार्यक्रममा स्वास्थ्यकर्मी, अनुसन्धानकर्ता, सञ्चारकर्मी लगायत विभिन्न क्षेत्रका विज्ञहरूको उपस्थिति रहेको थियो । आयोजकले यो कार्यक्रम नेपाल–चीन जनस्तरीय सम्बन्धमा थप मजबुती ल्याउनुका साथै स्वास्थ्य क्षेत्रमा दीर्घकालीन सहकार्यको आधार तयार पार्ने विश्वास व्यक्त गरेका छन्।