प्रेस काउन्सिल नेपालको वेबसाइट ह्याक, सेवा अवरुद्ध

काठमाडौं । प्रेस काउन्सिल नेपालको आधिकारिक वेबसाइट शुक्रबार अपरान्ह ह्याक भएको छ । काउन्सिलले आफ्नो आधिकारिक फेसबुक पेजमार्फत वेबसाइटमा समस्या आएको पुष्टि गर्दै त्यसको समाधानका लागि प्राविधिक टोली सक्रिय रहेको जनाएको छ ।

काउन्सिलले सामाजिक सञ्जालमा लेखेको छ, “काउन्सिलको वेबसाइटमा भरखरै समस्या आएको (ह्याक भएको) ले समस्या समाधानको प्रयास भइरहेको जानकारी गराइन्छ ।”

ह्याकपछि हाल प्रेस काउन्सिलको वेबसाइट पूर्ण रूपमा सञ्चालनविहीन बनेको छ । कसले र किन वेबसाइट ह्याक गर्‍यो भन्नेबारे हालसम्म कुनै जानकारी सार्वजनिक गरिएको छैन ।

प्रेस काउन्सिलका अनुसार प्राविधिक टोलीले साइट पुनः सञ्चालनमा ल्याउने प्रयास गरिरहेको छ र आवश्यक जाँचपछी थप जानकारी सार्वजनिक गरिनेछ ।

सूचना प्रविधिको दुरुपयोगका घटनामा पछिल्लो समय बृद्धि भइरहेका बेला पत्रकारिता नियमन गर्ने सरकारी निकायकै वेबसाइट ह्याक हुनु गम्भीर सुरक्षा चुनौतीको संकेतका रूपमा हेरिएको छ ।