पेट दुखाइको निहुँमा अस्पताल ल्याइएकी किशोरीले दिइन् शिशु जन्म, बलात्कारको आरोपमा एकजना पक्राउ

काभ्रेपलाञ्चोक । साउन २० गते पेट दुखाइको गुनासोसहित अस्पताल ल्याइएकी सिन्धुपाल्चोककी एक किशोरीले सोही दिन शिशु जन्माइन् । अविवाहित किशोरीले अकस्मात् बच्चा जन्माएपछि अस्पतालले प्रहरीलाई खबर गरेको थियो ।

प्रहरीको प्रारम्भिक अनुसन्धानमा ती किशोरीले बलात्कारका कारण गर्भवती भएको बताएकी छन् । जिल्ला प्रहरी कार्यालय सिन्धुपाल्चोकका प्रवक्ता माधव खरेलका अनुसार किशोरीले विभिन्न समयमा जबरजस्ती करणी भएको बयान दिएकी हुन् । यस आधारमा प्रहरीले सिन्धुपाल्चोककै ५० वर्षीय एक पुरुषलाई पक्राउ गरेर अनुसन्धान अघि बढाएको छ ।

पीडित किशोरीले बलात्कार र त्यसबाट गर्भ रहेको विषयमा सुरुमा परिवारलाई समेत जानकारी नगराएको खुलेको छ । ‘पेट दुखेको भनेर ल्याइएकी किशोरी गर्भवती रहेको परिवारले समेत नबुझेको देखिन्छ,’ प्रवक्ता खरेलले बताए ।

घटनाको संवेदनशीलता र गाम्भिर्यतालाई ध्यानमा राख्दै प्रहरीले पक्राउ परेका व्यक्तिमाथि जिल्ला अदालत सिन्धुपाल्चोकबाट म्याद लिएर अनुसन्धान जारी राखेको जनाएको छ ।