जनकपुरमा किशोरी हत्याः आमा प्रेमीका कारण १५ वर्षीया छोरीको ज्यान गयो

जनकपुरधाम । धनुषाको जनकपुरमा एक १५ वर्षीया किशोरीको हत्या आरोपमा उनकी आमासँग प्रेम सम्बन्ध रहेका एक पुरुषलाई प्रहरीले पक्राउ गरेको छ । पीडित किशोरी अञ्जली कुमारी यादव आफ्नी आमासँग डेरामा बस्दै आएकी थिइन् ।

धनुषा प्रहरीले क्षीरेश्वरनाथ नगरपालिका–९, इच्छापुरका ३५ वर्षीय रामबाबु साहलाई पक्राउ गरेर सार्वजनिक गरेको हो । उनलाई बुधबार राति १०ः३० बजे क्षीरेश्वरनाथकै क्षेत्रबाट पक्राउ गरिएको प्रहरीले जानकारी दिएको छ ।

श्रीमतीको हत्यामा जेल बसेर छुटेका रामबाबु, आमासँग प्रेम, छोरीको हत्या
रामबाबु साह विगतमा आफ्नै पहिलो पत्नीको हत्या अभियोगमा पाँच वर्ष जेल बसेका थिए । २०७७ सालमा रिहा भएपछि उनले दोस्रो विवाह गरे र मदिरा पसल सञ्चालन गर्न थाले । यही क्रममा उनले अञ्जलीकी आमा आशा यादवसँग सम्बन्ध बनाएका थिए ।

प्रहरीका अनुसार, आशाको पहिलाका श्रीमानले सम्बन्धबारे थाहा पाएपछि गाउँमा छलफल भयो । छलफलपछि आशा रामबाबुसँग बस्ने र पूर्व श्रीमानले सन्तानको हेरचाह गर्ने सहमति भएको थियो । त्यसयता आशा र रामबाबु जनकपुर–४, कटैयाचौरीमा डेरामा बस्दै आएका थिए ।

प्रेममा दरार, द्वन्द्वमा परिणति
प्रेमसम्बन्ध बिग्रन थालेपछि रामबाबु साहले आशालाई फोन नउठाएको, डेरा सारेर सम्पर्क टुटाउने, अनि आफ्नो श्रीमतीलाई म्यासेज गरेर घरमा झगडा लगाउने आरोप लगाएका छन् । प्रहरीले बताएअनुसार करिब दुई महिना अघि उनले आशालाई अटो किनिदिएका थिए, जुन आशाले पछि आफ्ना भाइको नाममा नामसारी गरेपछि सम्बन्ध चिसियो ।

रामबाबु साहले आशा आफ्नो पुराना श्रीमानतिर फर्किंदै गएको शंका गर्दै आएका थिए । यही ईर्ष्या, शंका र क्रोधका कारण घटना भएको प्रहरी अनुसन्धानबाट खुलेको छ ।

घटनाको रातः फोनबाट सुरु, खुकुरी प्रहारमा अन्त्य
प्रहरीका अनुसार, घटनाको रात साहले बारम्बार फोन गर्दा आशाले फोन छोरी अञ्जलीलाई दिने गर्थिन् । फोनमा भनाभनपछि उनी खुकुरी बोकेर आशाको डेरातर्फ गएका थिए । राति करिब ११ः३० बजे उनले खुकुरी प्रहार गर्दा अञ्जलीको घटनास्थलमै मृत्यु भयो ।

प्रहरीले दिएको जानकारीअनुसार, अञ्जलीकी आमा आशा यादव र ढल्केवरकी १४ वर्षीया राशा यादव पनि घटनामा घाइते भएका छन् । घाइते आशाको धरानस्थित बिपी कोइराला स्वास्थ्य विज्ञान प्रतिष्ठानमा उपचार भइरहेको छ र उनको अवस्था गम्भीर छ ।

प्रेम–विवाहको त्रिकोणीय द्वन्द्व, निसानामा किशोरी
यो घटना केवल एक आपराधिक मामिला नभई, प्रेम, अविश्वास, स्वार्थ र हिंसाको जटिल त्रिकोणको परिणाम देखिन्छ । जसको अन्त्यमा एक किशोरीले ज्यान गुमाउनु परेको छ, आमा गम्भीर घाइते भएकी छिन् र आरोपी फेरि कानुनी कठघरामा उभिएका छन् ।