रुवी साह हत्या प्रकरणः जल्नुअघि पासवानले फेसबुक भिडियोमा स्वीकारेका थिए अपराध

रौतहट । रुवी साह हत्या प्रकरणमा संलग्न भनिएका मुख्य आरोपी लक्ष्मण पासवानले आफ्नो शरीरमा आगो लगाउनु अघि भिडियो बनाएर फेसबुकमा सार्वजनिक गरेको पाइएको छ । उक्त भिडियोमा उनले रुवीको हत्या आफूले नै गरेको स्वीकार गरेका छन् ।

भिडियोमा पासवानले रुवीलाई हत्या गरेदेखि आफ्नो हात काँपिरहेको उल्लेख गर्दै भनेका छन्, “रुवीलाई मारेदेखि मेरो हात काँपिरहेको छ । ऊ मरिसकेकी छन्, म बाँचेर के गर्नु ? पक्राउ परे जेल जानुपर्छ, १०-१५ वर्ष सजाय भोग्नुपर्छ ।”

पासवानले रुवीसँगको लामो प्रेमसम्बन्धबारे पनि खुलासा गरेका छन् । उनका अनुसार हत्या अघि रुवी ब्युटीपार्लरबाट आफ्नो कोठामा आएको र दुईबीच ‘एकअर्का बिना बाँच्न नसक्ने’ प्रकारका संवाद भएको थियो । उनले भनेका छन्, “मैले भनेँ मलाई मार, उनले भनिन् मलाई मारिदेऊ ।”

उनका अनुसार स्कुल समयदेखि नै सम्बन्ध सुरु भएको र पछि अदालतमा गएर विवाहसमेत गरेका थिए । तर गरिबी र पारिवारिक तनावका कारण रुवीको हत्या गर्न पुगेको दाबी गरेका छन् ।

गत शनिबार राति १० बजेतिर गौर–सिरसिया सडकखण्ड अन्तर्गत गौर नगरपालिका–९ मुडवालगेटस्थित सडकमा २६ वर्षीया रुवी साहको शव सुटकेसभित्र भेटिएको थियो । रुवी माधव नारायण नगरपालिका–२, माधवपुरकी मूल घर भएकी र भारतको मुजफ्फरपुरमा समेत घर रहेको खुलेको छ । गौरमा डेरा लिएर बस्दै आएकी उनले ४ वर्षीया छोरालाई पढाउँदै आएकी थिइन् ।

प्रहरीको प्रारम्भिक अनुसन्धानअनुसार रुवीको गौरकै एक घरमा हत्या गरेर शव रिक्सामा राखी सुटकेसभित्र फालिएको हो । लक्ष्मण पासवानको घर रुवीको माइत टोलमै पर्छ ।

जिल्ला प्रहरी कार्यालय रौतहटका एसपी नेत्रमणी गिरीका अनुसार पासवान आज बिहान माधव नारायण नगरपालिका–६ स्थित नहर छेउमा आफैंले शरीरमा आगो लगाएको अवस्थामा भेटिएका थिए । उनलाई नियन्त्रणमा लिएर प्रहरीले उपचारका लागि अस्पताल पठाएको जनाएको छ ।