पाँच मतको अन्तरले ओखलढुंगामा रास्वपाका पोखरेल विजयी

ओखलढुंगा । प्रतिनिधिसभा सदस्यका लागि ओखलढुंगाबाट राष्ट्रिय स्वतन्त्र पार्टी (रास्वपा) का विश्वराज पोखरेल विजयी भएका छन् । पोखरेलले १३ हजार ९५३ मत प्राप्त गर्दै जित हात पारेका हुन् ।

उनका निकटतम प्रतिस्पर्धी नेपाली कांग्रेसका उम्मेदवार कुमार लुइटेलले १३ हजार ९४८ मत पाएका छन् । यी दुईबीचको मतान्तर मात्र ५ रहेको छ ।

निर्वाचन परिणामअनुसार तेस्रो स्थानमा नेपाली कम्युनिष्ट पार्टी (नेकपा) का अम्बिरबाबु गुरुङ रहेका छन् । उनले ११ हजार २९६ मत प्राप्त गरेका छन् । चौथो स्थानमा एमालेकी अस्मिता थापा रहिन् । उनले १० हजार ७२० मत पाएकी छन् ।

यसैगरी श्रम संस्कृति पार्टीका उद्धवकुमार राईले ३ हजार ८५८, उज्यालो नेपाल पार्टीका किशोरी कार्कीले ९६५, मंगोल नेशनल अर्गनाइजेशनका वजेन्द्र राईले २२३ तथा राप्रपाका डिकप्रसाद बास्तोलाले १७८ मत प्राप्त गरेका छन् ।

निर्वाचित पोखरेल नेपाल प्रहरीका पूर्व अतिरिक्त महानिरीक्षक (एआईजी) हुन् ।