कर्फ्यु हटेपछि सार्वजनिक सवारी चल्न थाले, जनजीवन सामान्यतर्फ

काठमाडौं । भदौ २४ मंगलबारदेखि ठप्प बनेको सार्वजनिक यातायात सेवा शनिबारदेखि पुनः सञ्चालनमा आएको छ । शुक्रबार छिटपुट मात्र सवारी गुडे पनि आज बिहानैदेखि राजधानीका सडकमा बाक्लो संख्यामा सार्वजनिक बस, ट्याक्सी र अन्य साधन चल्न थालेका छन् ।

चितवनलगायत विभिन्न स्थानबाट बसहरू काठमाडौंतर्फ आउन थालेका छन् ।

जेनजीको आन्दोलनकै कारण भदौ २३ गते सोमबार नयाँबानेश्वर वरपर बाहेकका क्षेत्रमा मात्र सार्वजनिक यातायात चलेको थियो । मंगलबारदेखि आन्दोलन तीव्र बनेसँगै उपत्यकाभर यातायात पूर्णरूपमा ठप्प भएको थियो । सेनाले लगाएको कर्फ्युका कारण सडक सुनसान बनेका थिए ।

शनिबार बिहान कर्फ्यु हटेपछि जनजीवन क्रमशः सामान्य बन्दै गएको छ । यातायात चल्न थालेसँगै पसलहरू खुल्न थालेका छन् भने क्षतिग्रस्त पसलहरूमा सरसफाइ कार्य सुरु गरिएको छ ।

मंगलबार रातिदेखि सडकमा खटिएको नेपाली सेना पनि शनिबारदेखि फिर्ता भएको छ ।