प्रधानमन्त्री कार्कीसँग चिनियाँ राजदूत सोङको बिदाइ शिष्टाचार भेट

काठमान्डु । प्रधानमन्त्री सुशीला कार्कीसँग नेपालका लागि चिनियाँ राजदूत छन सोङले आज शिष्टाचार भेट गरेका छन् । आफ्नो कूटनीतिक कार्यकाल पूरा गरी स्वदेश फर्किन लागेका राजदूत सोङले सिंहदरबारमा प्रधानमन्त्री कार्कीसँग बिदाइ भेट गरेका हुन् ।

प्रधानमन्त्रीको सचिवालयका अनुसार भेटका क्रममा नेपाल–चीन सम्बन्धका बहुआयामिक पक्ष, आपसी सहकार्य र द्विपक्षीय हितका समसामयिक विषयमा छलफल भएको थियो । दुवै पक्षले लामो समयदेखि कायम मित्रवत् सम्बन्धलाई अझ सुदृढ बनाउँदै लैजाने प्रतिबद्धता व्यक्त गरेका छन् ।

सो अवसरमा राजदूत सोङले चीन नेपालका लागि घनिष्ट मित्र मुलुक भएको उल्लेख गर्दै नेपालको विकास निर्माणका विभिन्न क्षेत्रमा चीनले निरन्तर सहयोग गर्दै आएको बताए । उनले भविष्यमा पनि सहयोग, साथ र समर्थन कायम रहने विश्वास व्यक्त गरे ।

प्रधानमन्त्री कार्कीले राजदूत सोङलाई सफल कार्यकाल पूरा गरेकोमा बधाई दिँदै सुखद यात्राको कामना गरिन् । साथै नेपाल ‘एक चीन’ नीतिप्रति दृढ रूपमा प्रतिबद्ध रहेको र नेपालको भूमिबाट चीनको राष्ट्रिय हितविरुद्ध कुनै गतिविधि हुन नदिने आश्वासन दिइन् ।

प्रधानमन्त्रीले चीनबाट सदाझैँ नेपालको विकास र समृद्धिका प्रयासमा निरन्तर सहयोग प्राप्त हुने अपेक्षा व्यक्त गर्दै दुई देशबीचको मैत्रीपूर्ण सम्बन्ध आगामी दिनमा अझ प्रगाढ हुँदै जाने विश्वाससमेत व्यक्त गरिन् ।