देशभर साधारण बदली, केही स्थानमा भारी वर्षाको सम्भावना

काठमाडौं । देशभर आज दिउँसो र राति सामान्यतया आंशिकदेखि पूर्ण बदली रहने जलवायु पूर्वानुमान गरिएको छ ।

जल तथा मौसम विज्ञान विभागका अनुसार कोशी, मधेश, बागमती, गण्डकी र लुम्बिनी प्रदेशका पहाडी भू(भागका केही स्थानहरूमा मध्यम वर्षाको सम्भावना छ भने तराई भू(भागका थोरै स्थानहरूमा पनि वर्षा हुन सक्ने देखिएको छ ।

यसबाहेक, मधेश प्रदेशसहित कोशी, बागमती, गण्डकी र लुम्बिनी प्रदेशका पहाडी भू(भागका एक–दुई स्थानमा आज दिउँसो भारी वर्षा हुन सक्ने सम्भावना रहेको विभागले जनाएको छ ।

आज रातिको पूर्वानुमान अनुसार पनि देशभर साधारण बदली रहनेछ । कोशी, मधेश, बागमती, गण्डकी र लुम्बिनी प्रदेशका केही स्थानहरूमा तथा अन्य पहाड र तराई भू(भागका थोरै स्थानहरूमा मध्यम वर्षाको सम्भावना छ ।

त्यस्तै, रातिको समयमा कोशी प्रदेशको पहाड र तराई, मधेश प्रदेश, गण्डकी प्रदेश र लुम्बिनी प्रदेशका तराई भू(भागका एक–दुई स्थानहरूमा भारी वर्षा हुन सक्ने सम्भावना रहेको छ ।

हाल मनसुनको न्यून चापीय रेखा पूर्वतर्फ सामान्य स्थान वरपर तथा पश्चिमतर्फ सामान्य भन्दा केही उत्तरतिर अवस्थित रहेको जानकारी विभागले दिएको छ ।

वर्षाका कारण पहिरो, बाढी तथा सतही वहाव बढ्ने सम्भावना रहेकोले जोखिमयुक्त स्थानमा सतर्कता अपनाउन यात्रुहरू, कृषकहरू तथा स्थानिय निकायहरूलाई सुझाव दिइएको छ ।