एआईजीमा बढुवा भएका ठाडा मगरलाई दर्ज्यानी चिन्ह प्रदान

काठमाडौं । सशस्त्र प्रहरी बलका नवनियुक्त अतिरिक्त महानिरीक्षक (एआईजी) गणेश बहादुर ठाडा मगरलाई दर्ज्यानी चिन्ह प्रदान गरिएको छ ।

सशस्त्र प्रहरी महानिरीक्षक (आईजीपी) राजु अर्यालले ठाडालाई दर्ज्यानी चिन्ह टाँसेका हुन् । सोमबार बसेको मन्त्रिपरिषद् बैठकले ठाडालाई सशस्त्र प्रहरी नायब महानिरीक्षक (डीआईजी) पदबाट एआईजीमा बढुवा गरेको थियो ।

चिह्न प्रदान गर्दै आईजीपी अर्यालले ठाडालाई पदोन्नतीप्रति बधाई ज्ञापन गर्दै नयाँ जिम्मेवारीलाई इमान्दारिता र व्यावसायिकताका साथ निर्वाह गर्न आग्रह गरे । उनले संगठनको दीर्घकालीन लक्ष्य प्राप्तिमा वरिष्ठ अधिकारीहरूबाट सञ्चित ज्ञान, सीप, अनुभव र क्षमताको समुचित प्रयोग हुने उल्लेख गर्दै सेवामूलक भूमिकामा नागरिकप्रति उत्तरदायी बन्नुपर्ने धारणा राखे ।

‘भ्रष्टाचार र लैङ्गिक हिंसाको विरुद्ध शून्य सहनशीलताको नीति अपनाउँदै मानव अधिकारको सम्मान र प्रवर्द्धनमा कटिबद्ध भएर काम गर्नुपर्छ,’ अर्यालले भने, ‘अनुशासन, इमान्दारिता, पारस्परिक सहयोग र बन्धुत्वको भावना राखी संगठनप्रति समर्पित रहनुपर्छ ।’

दर्ज्यानी चिह्न प्रदान समारोहमा सशस्त्र प्रहरी परिवार महिला संघकी अध्यक्ष अनिता लामिछाने अर्याल, एआईजीद्वय नारायणदत्त पौडेल र वंशीराज दाहाल, संघका पदाधिकारी, सशस्त्र प्रहरीका विभिन्न तहका अधिकृत र जवानहरू सहभागी थिए ।