टिकटकमार्फत चरित्र हत्या गरेको आरोपमा एक पक्राउ

काठमाडौं । सामाजिक सञ्जाल टिकटकमार्फत व्यक्तिहरूको चरित्र हत्या गरेको आरोपमा एक महिला प्रहरीको फन्दामा परेकी छिन् ।

नेपाल प्रहरीको साइबर ब्युरोले खोटाङ स्थायी घर भई हाल भक्तपुरमा बसोबास गर्दै आएकी ३१ वर्षीया रमा बस्नेतलाई आइतबार पक्राउ गरेको हो ।

प्रहरीका अनुसार बस्नेतले टिकटकमा विभिन्न जातीय र धार्मिक समूहबीच द्वेष फैलाउने खालका सामग्रीहरू निरन्तर पोस्ट गर्दै आएकी थिइन् । त्यसका साथै, उनले केही प्रतिष्ठित व्यक्ति र संस्थाहरूमाथि तथ्यहीन आरोप लगाउने भिडियोहरू सार्वजनिक रूपमा प्रसारण गरेकी थिइन् ।

साइबर ब्युरोले प्राप्त उजुरीहरूको आधारमा प्रविधि प्रयोग गरी अनुसन्धान अघि बढाएको थियो । अनुसन्धानका क्रममा ती सामग्रीहरू बस्नेतकै खाताबाट प्रकाशित भएको पुष्टि भएपछि उनलाई नियन्त्रणमा लिइएको जनाइएको छ ।

उनमाथि विद्युतीय कारोबार ऐन, २०६३ अन्तर्गत मुद्दा दायर गरिएको छ र हाल उनी प्रहरी हिरासतमा रहेर अनुसन्धानको प्रक्रिया अगाडि बढाइएको साइबर ब्युरोले जनाएको छ ।

प्रहरी स्रोतका अनुसार उनका सामाजिक सञ्जाल खाताहरूमा प्रधानमन्त्री केपी शर्मा ओली, काठमाडौं उपमेयर सुनिता डंगोलविरुद्ध आरोप लगाइएका सामग्रीहरू रहेका छन् भने रवि लामिछाने र मेयर बालेन शाहको पक्षमा बनाइएका भिडियो पनि भेटिएका छन् ।