देशका विभिन्न जिल्लाबाट लागूऔषधसहित २३ जना पक्राउ

काठमाडौं । नेपाल प्रहरीले लागूऔषधविरुद्ध सञ्चालन गरेको अभियानअन्तर्गत काठमाडौंसहित देशका विभिन्न जिल्लाबाट २३ जनालाई पक्राउ गरेको छ । पक्राउ परेकाहरूबाट गाँजा, ब्राउनसुगर, खैरो हेरोइन, पोलेन तथा विभिन्न प्रकारका नियन्त्रित औषधिसमेत बरामद भएको प्रहरीले जनाएको छ ।

काठमाडौंको नरेफाँटबाट प्रहरीले सिन्धुली घर भई हाल काठमाडौं बस्दै आएकी ५० वर्षीया कोमलमाया पाख्रिनलाई करिब २२ किलोग्राम गाँजा र नगद ८ हजार ५ सय रुपैयाँसहित पक्राउ गरेको छ । त्यस्तै कलंकीबाट ४२ वर्षीय नरेन्द्रकुमार थापा मगरलाई करिब ३ ग्राम ब्राउनसुगरसहित नियन्त्रणमा लिइएको छ ।

कास्कीको पोखराबाट २५ वर्षीय हरिबहादुर घर्ती, धनुषाको जनकपुरबाट २५ वर्षीय नवीनकुमार यादव तथा कञ्चनपुरबाट गोविन्दबहादुर साउदसहित अन्य व्यक्तिहरूलाई पनि ब्राउनसुगर, खैरो हेरोइन तथा डाइजेपाम, बुप्रेनोर्फिन र फेनारगनजस्ता नियन्त्रित औषधिसहित पक्राउ गरिएको प्रहरीले जनाएको छ ।

त्यसैगरी कञ्चनपुर, कपिलवस्तु, बर्दिया, पर्सा, ललितपुर, सिन्धुली, सुर्खेत, बाँके र सर्लाहीमा गरिएको छुट्टाछुट्टै कारबाहीका क्रममा थप लागूऔषध बरामद हुनुका साथै १८ जनाभन्दा बढी व्यक्तिलाई नियन्त्रणमा लिइएको छ । केही स्थानमा घर तथा डेरा खानतलासी गर्दा डिजिटल तराजु, नगद र ठूलो परिमाणमा लागूऔषध फेला परेको प्रहरीले जनाएको छ ।

सर्लाहीमा पक्राउ परेका एक व्यक्तिको घर पछाडिको खेतमा लुकाएर राखिएको २ सय १८ वटा नाइट्राजेपाम ट्याब्लेट र १ सय ४४ वटा स्पास्मो ट्याब्लेट समेत बरामद गरिएको छ । यस्तै कपिलवस्तु र बाँकेमा प्रारम्भिक पक्राउपछि गरिएको थप अनुसन्धानका क्रममा थप लागूऔषध फेला परेको प्रहरीले जनाएको छ ।

नेपाल प्रहरीले लागूऔषध ओसारपसार, बिक्री–वितरण तथा सेवन नियन्त्रणका लागि देशभर निगरानी र कारबाहीलाई तीव्र बनाएको जनाएको छ । पक्राउ परेका सबै व्यक्तिमाथि लागूऔषध सम्बन्धी कसुरमा थप अनुसन्धान र कानुनी प्रक्रिया अघि बढाइएको प्रहरीले जानकारी दिएको छ ।