वेस्ट इण्डिजको प्रभावशाली जित, स्कटल्याण्ड ३५ रनले पराजित

काठमाडौं । आईसीसी टी–२० पुरुष विश्वकपअन्तर्गत दोस्रो खेलमा वेस्ट इण्डिजले स्कटल्याण्डमाथि ३५ रनको प्रभावशाली जित हात पारेको छ । भारतको कोल्कातास्थित ऐतिहासिक इडेन गार्डेन्समा सम्पन्न खेलमा वेस्ट इण्डिजले दिएको १८४ रनको लक्ष्य पछ्याएको स्कटल्याण्ड १९ ओभर ५ बलमै १४७ रनमा अलआउट भयो ।

जवाफी ब्याटिङमा स्कटल्याण्डका कप्तान रिची बेरिङटनले २४ बलमा ४२ रनको योगदान दिए पनि टोलीलाई जितसम्म पुर्‍याउन सकेनन् । उनले तीन चौका र दुई छक्का प्रहार गरे । टम ब्रुसले २८ बलमा ३५ रन बनाउँदा जर्ज मुन्सेले १९ रन जोडे ।

वेस्ट इण्डिजका बलर रोमारियो शेफर्ड खेलका नायक बने । उनले एक्लैले पाँच विकेट लिए । जेसन होल्डरले तीन विकेट झार्दा गुडकेश मोती र शमार जोसेफले एक–एक विकेट हात पारे ।

यसअघि टस हारेर पहिले ब्याटिङ गरेको वेस्ट इण्डिजले निर्धारित २० ओभरमा पाँच विकेट गुमाउँदै १८२ रनको प्रतिस्पर्धात्मक स्कोर खडा गरेको थियो । शिमरन हेटमायरले ३६ बलमा ६४ रनको विस्फोटक पारी खेले । उनको इनिङ्समा दुई चौका र छ छक्का समावेश थिए ।

ब्रान्डन किङले ३० बलमा ३५ रन जोडे भने शेरफेन रुथफोर्डले १३ बलमा २६ रन बनाए । रोभमन पावेलले १४ बलमा २४ रनको योगदान दिए ।

स्कटल्याण्डका तर्फबाट बलिङमा ब्राड कुरीले दुई विकेट लिए । माइकल लिस्क, ओलिभर डेभिडसन र सफयान शरिफले समान एक–एक विकेट लिए ।