नारायणी अस्पतालमा उपचारका क्रममा कैदीको मृत्यु, आफन्तको प्रदर्शन

वीरगन्ज । वीरगन्जको नारायणी अस्पतालमा उपचार भइरहेका बेला मंगलबार एकजना कैदीको मृत्यु भएको छ । मृत्यु हुने वीरगन्ज महानगरपालिका–२५ निवासी ३ वर्षदेखि कर्तव्य ज्यान मुद्दामा जेल सजाय काटिरहेका राहुल साह रहेका छन् ।

जिल्ला प्रहरी कार्यालय पर्साका प्रमुख गौतम मिश्रका अनुसार साहलाई बिहान कारागारभित्र व्यायाम गर्दै गर्दा स्वास्थ्य समस्या आएको थियो । ‘उनी तत्कालै अस्पताल ल्याइए, तर उपचारका क्रममा मृत्यु भयो,’ मिश्रले बताए ।

साहमाथि अदालतले २५ वर्षको कैद सजाय सुनाएको थियो ।

मृत्युको खबर बाहिरिएसँगै साहका आफन्तहरूले अस्पताल, जेल प्रशासन र चिकित्सकमाथि लापरबाहीको आरोप लगाउँदै नारायणी अस्पताल बाहिर टायर बालेर प्रदर्शन गरेका छन् ।

परिवारको दाबी अनुसार प्रारम्भिक उपचारपछि अस्पतालले अन्यत्र पठाउन सिफारिस गरे पनि जेल प्रशासनले अनुमति नदिँदा मृत्यु भएको हो । उनीहरूले घटनाको निष्पक्ष छानबिन र दोषीमाथि कारबाहीको माग गरेका छन् ।