नेपालले दोहोर्यायो एसीसी यु–१६ इस्ट जोन कपको विजयी यात्रा

काठमाडौं । नेपाली यु–१६ टोलीले फेरि एक पटक आफ्नो क्षमता प्रमाणित गर्दै एसीसी पुरुष यु–१६ इस्ट जोन कपको उपाधि जितेको छ । रोमाञ्चक फाइनल खेलमा नेपालले सिंगापुरलाई २ विकेटले पराजित गर्दै लगातार दोस्रो पटक उपाधि आफ्नो पोल्टामा पारेको हो ।

सिंगापुरले प्रस्तुत गरेको ११४ रनको लक्ष्य नेपालले २९ ओभरमै ८ विकेट गुमाउँदै ११७ रन बनाउँदै पूरा गर्यो । यस जितसँगै समूह चरणमा प्राप्त जितलाई फाइनलमा दोहोर्याउँदै नेपालले पुनः सिंगापुरलाई हराएको छ ।

स्मरणीय छ, यसै प्रतियोगिताको समूह चरणमा पनि नेपालले सिंगापुरमाथि ६ विकेटको जित दर्ता गर्दै शीर्ष स्थान हासिल गरेको थियो ।

नेपालले यसअघि सन् २०२३ मा पनि उपाधि जितेको थियो । यस पटकको जितले नेपालको यु–१६ टोलीलाई लगातार दोस्रो उपाधि दिलाउँदै क्षेत्रीय क्रिकेटमा बलियो हैसियत स्थापित गराएको छ ।