जिवन शर्मासँगको भेटपछि पूर्वमन्त्री किराती भावुकः ‘नेपालमा त्यस्तो पनि मान्छे रहेछ, पद अस्वीकार गर्ने’

काठमाडौं । ‘चाहिँदैन मलाई सुनको दरबार’ जनताको मनमा गहिरो प्रभाव पार्ने गीतका सर्जक जनगायक जिवन शर्मा सधैँझैँ सिद्धान्तमा अडिग छन् । यही अडानका कारण पूर्वमन्त्री सुदन किरातीले २०७९ फागुन ३ गते प्रतिष्ठानको कुलपति बन्न आग्रह गर्दा उनले विनम्र अस्वीकार गरेका थिए ।

सामाजिक सञ्जालमा एक सार्वजनिक टिप्पणीमार्फत पूर्वमन्त्रीले शर्मासँगको सम्बन्ध र एउटा असामान्य प्रस्ताव अस्वीकारको प्रसङ्ग सार्वजनिक गरेका छन् । उनले लेखेका छन्, ‘म मन्त्री थिएँ र मलाई सम्झना छ— उहाँलाई मैले भनेको थिएँ, ‘तपाईं नेपाल नाट्य सङ्गीत प्रतिष्ठानको कुलपति बनिदिनुहोस् ।’ उहाँले भने, ‘प्रस्तावका लागि धन्यवाद, तर कृपया मलाई कुलपति नबनाइदिनुहोस् ।’

पदभन्दा मूल्य ठूलो ठान्ने व्यक्तित्व
पूर्वमन्त्रीका अनुसार, उक्त क्षणमा उनलाई लाग्यो— ‘नेपालमा त्यस्तो मान्छे पनि रहेछ, आफैं खोजेर त्यति ठूलो पदमा बसिदिनुहोस् भनिँदा पनि विनम्रतापूर्वक इन्कार गर्ने ।’ त्यही बिन्दुले दुईबीचको सम्बन्धलाई अझ गहिरो बनाएको उनले बताएका छन् । ‘हाम्रो सम्बन्धमा एकअर्काको मनभित्र गहिरो सम्मान बसिसकेको रहेछ,’ उनले लेखे ।

अचानकको भेट, पुरानो स्मृतिको पुनरावलोकन
हालै भएको आकस्मिक भेटको सन्दर्भ दिँदै पूर्वमन्त्रीले थप लेखेका छन्, ‘हिजो हाम्रो अचानक भेट भयो र उहाँले त्यही प्रसङ्ग सम्झनुभयो । मलाई फेरि त्यही कुरा स्मरण भयो— सिद्धान्त र व्यवहार सँगसँगै हिँड्न सक्ने पात्रहरू अझै बाँकी छन् ।’

राजनीति र सिद्धान्तको द्वन्द्वमा एक सन्देश
भेटपछि पूर्वमन्त्रीको मनमा फेरि गुञ्जियो शर्माको कालजयी गीतः
‘चाहिँदैन मलाई सुनको दरबार,
चाहिँदैन मलाई हिरा–मोतीको हार’
उक्त गीतको सार नै शर्माको जीवनदर्शन बनेको छ । जनताको पक्षमा कलम र स्वर उठाउने उनीजस्ता व्यक्तित्वको मुल्याङ्कन राजनीतिमा अझै कति सम्भव छ भन्ने प्रश्न भने खुला नै रहन्छ ।