विराटनगर किंग्सको लगातार दोस्रो जीत, काठमाण्डु गुर्खाज फेरि पराजित

काठमाडौं । नेपाल प्रिमियर लिग (एनपीएल)मा शनिबार विराटनगर किंग्सले उत्कृष्ट प्रदर्शन गर्दै काठमाण्डु गुर्खाजलाई ५ विकेटले पराजित गर्दै लगातार दोस्रो जित हात पारेको छ । काठमाण्डुले दिएको १३५ रनको लक्ष्य विराटनगरले १७.१ ओभरमै पाँच विकेटको क्षतिमा सजिलै पूरा गर्‍यो ।

यसअघि विराटनगरले आफ्नो पहिलो खेलमा पोखरा एभेन्जर्सलाई ५३ रनले हराएको थियो । काठमाण्डुले भने पहिलो खेलमा जनकपुर बोल्ट्समाथि ५ विकेटको जित निकाले पनि दोस्रो खेलमा सुदूरपश्चिम रोयल्ससँग २९ रनले पराजित भएको थियो ।

विराटनगरको ब्याटिङ प्रदर्शन
मार्टिन गप्टिल २५ रन जोडेर शाहब आलमको बलमा इरासमसका हातबाट क्याच आउट भए । जर्ज मुन्सी ३६ रनको योगदान गरे । उनलाई शाहब आलम एलबीडब्ल्युको धरापमा पारे भने बसिर अहमद १९ रनको योगदान दिँदै इरासमसको बलमा क्याच आउट भए ।

यसैगरी, लोकेश बम १४ रन, नरेन भट्ट २५ रन, शुभम रन्जाने ६ रन र सन्दीप लामिछाने ९ रन जोडे ।

काठमाण्डुका लागि शाहब आलमले २ विकेट लिँदा करण केसी, जेरहार्ड इरासमस र सन्तोष यादवले एक–एक विकेट हात पारे ।

यसअघि टस जितेर फिल्डिङ रोजेका विराटनगरलाई काठमाण्डुले ६ विकेटको क्षतिमा १३४ रनको मध्यम लक्ष्य दिएको थियो ।

उसका लागि आदिल आलमले २५ बलमा ४ चौका र २ छक्कासहित ४८ रन जोडे । वेन चार्ल्सवर्थ ३२ रन, सन्तोष यादव २६ रन, जेरहार्ड इरासमस १० रनको योगदान गरे ।

विराटनगरका मर्चेन्ड डे लाङ्गेले २ विकेट हात पारे भने शुभम रन्जाने, सन्दीप लामिछाने र सूर्य तामाङले समान १–१ विकेट लिए ।