हरमितको उत्कृष्ट प्रदर्शन, सुदूरपश्चिम रोयल्सद्वारा काठमाडौं गोर्खाज पराजित

काठमाडौं । हरमित सिंहले ब्याटिङ र बलिङ दुवैमा उत्कृष्ट प्रदर्शन गरेपछि सुदूरपश्चिम रोयल्सले नेपाल प्रिमियर लिग (एनपीएल) अन्तर्गत काठमाडौं गोर्खाजलाई ३० रनले हराउँदै सानदार जित दर्ता गरेको छ । कीर्तिपुरस्थित त्रिवि क्रिकेट मैदानमा १४८ रनको लक्ष्य पछ्याएको काठमाडौं १६.५ ओभरमै ११८ रनमा समेटिँदै पराजित भयो ।

पहिलो खेलमा साविक विजेता जनकपुरलाई पाँच विकेटले पराजित गरेको काठमाडौं गोर्खाजले दोस्रो खेलमा भने निराशाजनक प्रदर्शन गर्‍यो । सुदूरपश्चिमका बलरहरूको बलिङ अगाडि काठमाडौंका ब्याटरहरू टिक्न सकेनन् ।

काठमाडौंका आकाश त्रिपाठीले ३० बलमा ३४ रन बनाए पनि अन्य ब्याटरले साथ दिन सकेनन् । जोन सिमसनले २५ रन, भीम सार्कीले १२ रन, मिलिन्द कुमारले ११ रनको योगदान दिए भने बेन चाल्सवर्थ (८), सन्तोष यादव (१), आदिल आलम (०) र कप्तान करण केसी (१) पनि दोहोरो अंक छुन असफल रहे ।

सुदूरपश्चिमका हेमन्त धामी, हरमित सिंह र स्कट कुग्लेनिजले २–२ विकेट लिए । ईशान पाण्डे, अविनास बोहोरा र नरेन साउँदले १–१ विकेट हात पारे ।

यसअघि टस हारेर पहिला ब्याटिङ गरेको सुदूरपश्चिमले सुरुवाती चरणमा संघर्ष गर्‍यो । पहिलो ओभरमै दुई विकेट गुमाएको टोली ६ ओभरमा चार विकेट झर्दा २७ रन मात्र जोडेको थियो । तर मध्यक्रमबाट आएको पुनरागमनले टोलीलाई सम्मानजनक स्कोरसम्म पुर्‍यायो ।

सबैभन्दा ठूलो योगदान हरमित सिंह र दिपेन्द्रसिंह ऐरीको साझेदारीको रह्यो । उनीहरुले ७औँ विकेटका लागि २५ बलमा ६१ रनको साझेदारी गरे । हरमितले २० बलमा २ चौका, ६ छक्का सहित ५३ रन जोडे भने दिपेन्द्रले ३० बलमा ३९ रन बनाए ।

इन्निङ्सको अन्तिम चरणमा दिपेन्द्रलाई जीवनदान मिलेको क्षणले पनि सुदूरपश्चिमको स्कोर निर्माणमा भूमिका खेलेको थियो ।

कप्तान करण केसीले पहिलो ओभरमै २ विकेट लिँदै उत्कृष्ट सुरुवात दिलाए । उनले २ ओभरमा २ रन मात्र खर्चेर ३ विकेट लिए । मिलिन्द कुमार, रसिद खान र सन्नी पटेलले पनि २–२ विकेट हात पारे ।

हरमित सिंहले आजको खेलमा अलराउन्ड खेल प्रदर्शन गर्दै म्यान अफ द म्याच भए । उनले ब्याटिङमा २० खेल्दै ५३ रन जोडे भने बलिङमा २१ रन खर्चेर २ विकेट हात पारे । उनकै नेतृत्वमा सुदूरपश्चिमले खराब सुरुवातलाई जितमा परिणत गर्न सफल भयो ।