एमालेको दोस्रो विधान महाधिवेशन आज सम्पन्न हुदै

काठमाडौं । सत्तारूढ नेकपा एमालेको दोस्रो विधान महाधिवेशन आज ललितपुरको गोदावरीमा सम्पन्न हुने तयारी भएको छ । महाधिवेशन समसामयिक प्रस्ताव पारित गरेर आज साँझसम्म टुंगिनेछ ।

तेस्रो दिन आज (आइतबार) बिहान ९ बजेदेखि महाधिवेशनको कार्यक्रम सुरु भएको हो ।

शनिबार १० वटा समूहबीच दस्तावेजमाथि छलफल सकिएको थियो । छलफलका आधारमा प्रतिनिधिहरूले दिएका सुझाव संकलन गरी समूहहरूले प्रतिवेदन तयार पारिरहेका छन् । आज समूह नेताहरूले सो प्रतिवेदन प्रस्तुत गर्नेछन् ।

समूहगत छलफलका क्रममा आएका जिज्ञासा तथा सुझावमा अध्यक्ष केपी शर्मा ओलीले जवाफ दिने कार्यक्रम छ । तर, सहमति नजुटेमा मतदानमार्फत निष्कर्ष निकाल्ने एमालेको तयारी छ ।

महाधिवेशनमा अध्यक्ष ओलीले राजनीतिक प्रतिवेदन, महासचिव शंकर पोखरेलले साङ्गठनिक प्रतिवेदन, उपाध्यक्ष विष्णु पौडेलले विधान संशोधन प्रतिवेदन प्रस्तुत गरेका थिए ।

त्यस्तै अमृतकुमार बोहोरा (केन्द्रीय सल्लाहकार परिषद्), केशव वडाल (केन्द्रीय अनुशासन आयोग), डा. पुष्प कँडेल (केन्द्रीय लेखा आयोग), र डा. विजय सुब्बा (केन्द्रीय निर्वाचन आयोग) ले आ–आफ्नो निकायको प्रतिवेदन पेश गरेका छन् ।

‘निर्णायक राष्ट्रिय शक्ति निर्माण हाम्रो संकल्प, समृद्ध नेपाल सुखी नेपाली राष्ट्रिय गन्तव्य’ भन्ने मूल नारासहित सुरु भएको महाधिवेशनमा देशभरबाट आएका २,०२६ प्रतिनिधि र आयोजकका ३१५ गरी कुल २,३४१ जना सहभागी छन् ।