भोटेकोशी बाढी संकटबारे छलफल गर्न बुधबार प्रतिनिधिसभा बैठक बस्दै

काठमाडौं । संघीय संसद्अन्तर्गत प्रतिनिधिसभाको बैठक बुधबार बस्ने भएको छ । कार्यव्यवस्था परामर्श समितिको बैठकपछि सभामुख डीपी अर्यालले बुधबार दिउँसो १ बजेका लागि बैठक आह्वान गरेका हुन् ।

संघीय संसद् सचिवालयका महासचिव पद्मप्रसाद पाण्डेयले बैठकसम्बन्धी औपचारिक सूचना सार्वजनिक गरिसकेका छन् ।

बुधबारको बैठकमा भोटेकोशी बाढीबाट उत्पन्न संकट, त्यसबाट भएको जनधनको क्षति तथा खोजी, उद्धार र प्रतिकार्यका विषयमा विशेष प्रस्ताव पेस गर्ने तयारी गरिएको छ । उक्त प्रस्तावमाथि प्रतिनिधिसभामा प्रतिनिधित्व गर्ने सबै राजनीतिक दलका नेताहरूले दलीय आधारमा धारणा राख्ने कार्यसूची तय गरिएको छ।

बैठकमा बाढी प्रभावित क्षेत्रमा तत्काल उद्धार तथा राहत प्रभावकारी बनाउने, क्षतिको व्यवस्थापन गर्ने र प्रभावितको पुनःस्थापनाका लागि आवश्यक कदम चाल्ने विषयमा समेत छलफल हुने भएको छ ।

यसअघि रसुवामा आएको विनाशकारी बाढीका कारण गत भदौ ११ गते प्रतिनिधिसभाको बैठक अर्को सूचना जारी नभएसम्मका लागि स्थगित गरिएको थियो ।