चीनतर्फको हिमतालमा हिमनदी फुटेपछि त्रिशूलीमा सतर्कता, ठूलो जोखिम नरहेको सरकारको भनाइ

काठमाडौं । चीनको छोचेन खोला र पुरेपु त्साङ्पो नदीको संगम नजिक बनेको ठूलो तालमा हिमनदी (ग्ल्यासियर) फुटेपछि लेदोसहित पानी ओभरफ्लो भएको सरकारले जनाएको छ । यद्यपि, हालसम्म यसबाट तत्काल ठूलो जोखिम उत्पन्न हुने अवस्था नरहेको सरकारको भनाइ छ ।

शुक्रबार मन्त्रिपरिषद् बैठकपछि सञ्चारकर्मीसँग कुरा गर्दै सरकारका प्रवक्ता तथा शिक्षा तथा खेलकुदमन्त्री सस्मित पोखरेलले चिनियाँ पक्षबाट प्राप्त पछिल्लो सूचनाअनुसार अवस्था नियन्त्रणमै रहेको बताए ।

उनका अनुसार केही समयअघि चिनियाँ पक्षले ताल फुटेर बाढी आएको जानकारी गराएको थियो । त्यसपछि नेपाल सरकारले अवस्थाबारे चीनसँग निरन्तर समन्वय गर्दै आएको छ । परराष्ट्र मन्त्रालयमार्फत चिनियाँ अधिकारीसँग नियमित सम्पर्क भइरहेको उनले जानकारी दिए ।

मन्त्री पोखरेलले ठूलो ड्याम फुटेको नभई हिमनदीका केही भाग फुटेका कारण तालमा पानी र लेदोको बहाव बढेर ओभरफ्लो भएको जानकारी प्राप्त भएको बताए ।

ताल फुटेको खबरसँगै त्रिशूली नदीको तटीय क्षेत्रमा उच्च सतर्कता अपनाइएको छ । सम्भावित जोखिमलाई ध्यानमा राख्दै प्रहरीले नदी आसपासका बस्तीमा माइकिङ गरेर नागरिकलाई सुरक्षित स्थानमा जान आग्रह गरिरहेको छ ।

सुरक्षाकर्मीहरूले समेत नदी किनारमा रहेका नागरिकलाई जोखिमयुक्त क्षेत्रबाट सुरक्षित स्थानतर्फ सारिरहेका छन् । कतिपय स्थानीय बासिन्दा प्रहरीको सूचनापछि आफैँ पनि सुरक्षित स्थानतर्फ जान थालेका छन् ।

सरकारले तत्काल ठूलो जोखिम नरहेको बताए पनि सम्भावित अवस्थालाई मध्यनजर गर्दै सतर्कता नघटाउन आग्रह गरेको छ । मन्त्री पोखरेलले नदी तटीय क्षेत्रका बासिन्दालाई सावधानी अपनाउँदै आधिकारिक सूचनाको पालना गर्न आग्रह गरे ।