मुख्यमन्त्री लामाले दिए राजीनामा, ‘दलभित्रकै प्रपञ्चका कारण सरकार छाड्नुपर्यो’

हेटौंडा । बागमती प्रदेशका मुख्यमन्त्री बहादुरसिंह लामाले आइतबार साँझ पदबाट राजीनामा दिएका छन् ।

२०७८ साउन ९ गते मुख्यमन्त्रीको जिम्मेवारी सम्हालेका लामाले एक वर्ष ९ दिनपछि पद त्याग गरेका हुन् । नेपाली कांग्रेसबाट मुख्यमन्त्री बनेका उनी तामाङ समुदायबाट प्रदेश सरकारको नेतृत्व गर्ने पहिलो व्यक्ति हुन् ।

लामाले पार्टी सभापति शेरबहादुर देउवाको निर्देशनमा राजीनामा दिएको स्पष्ट पारे । साँझ ६ बजे मुख्यमन्त्री तथा मन्त्रिपरिषद् कार्यालयअन्तर्गत प्रदेश सुशासन हलमा आयोजना गरिएको पत्रकार सम्मेलनमा लामाले आफ्नो कार्यकालमा भएका उपलब्धिहरू सार्वजनिक गरे ।

कार्यक्रममा उनले आफूले इमान्दारीका साथ काम गरेको जिकिर गर्दै, ‘आफ्नै दलभित्रको चलखेलका कारण सरकार छाड्न बाध्य भएँ,’ भने । घटनाक्रमबाट नभाग्ने प्रतिबद्धता व्यक्त गर्दै उनले यो अवस्थाले लोकतन्त्र र गणतन्त्र नै संकटमा परेको संकेत गरेको आरोप लगाए ।