खोटाङमा हेलिकोप्टर दुर्घटना, मानवीय क्षति नभएको पुष्टि

खोटाङ । जिल्लाको केपिलासगढी गाउँपालिका–२ खार्ताम्छाको बालाबेसी क्षेत्रमा हेलिकोप्टर दुर्घटनामा परेको छ । काठमाडौंबाट शव लिएर गाउँ पुगेको उक्त हेलिकोप्टर अवतरण गर्ने क्रममा दुर्घटनामा परेको हो ।

प्रमुख जिल्ला अधिकारी रेखा कँडेलका अनुसार दुर्घटनाबारे प्रारम्भिक जानकारी प्राप्त भइसकेको छ र घटनामा कुनै मानवीय क्षति नभएको पुष्टि गरिएको छ ।

गाउँपालिका अध्यक्ष समिर राईका अनुसार हेलिकोप्टर बारीको डिलमा अवतरण गर्ने प्रयासमा थियो । प्रारम्भमा डिलमा अवतरण गर्न खोजिएको हेलिकोप्टरलाई पुनः उठाएर बारीको बीच भागतर्फ लैजान खोज्दा असन्तुलन भई दुर्घटना भएको हो ।