नेपालको लगातार दोस्रो हार, श्रीलङ्कासँग ३–२ ले पराजित

काठमाडौं । पुरुष सेन्ट्रल एसियन भलिबल एसोसिएसन (काभा) च्याम्पियनसिपमा नेपालले लगातार दोस्रो हार व्यहोरेको छ । पाकिस्तानको इस्लामावादस्थित लियाकत जिम्नेसियममा बिहीबार भएको प्रतिस्पर्धात्मक खेलमा नेपाल श्रीलङ्कासँग ३–२ को सेटमा पराजित भएको हो ।

खेलको सुरुआत श्रीलङ्काले उत्कृष्ट गर्दै पहिलो सेट २५–१८ ले आफ्नो पक्षमा पारेको थियो । त्यसपछि नेपालले प्रभावशाली पुनरागमन गर्दै लगातार दोस्रो र तेस्रो सेट क्रमशः २५–२१ र २५–१९ ले जितेर खेलमा अग्रता बनाएको थियो ।

तर चौथो सेटमा श्रीलङ्काले पुनः लय समात्दै २५–२१ को जित निकाल्यो र खेललाई निर्णायक पाँचौँ सेटमा पुर्‍यायो । अन्तिम सेटमा पनि श्रीलङ्काले १५–११ को जित दर्ता गर्दै नेपाललाई पराजित गर्‍यो ।

यसअघि प्रतियोगिताको उद्घाटन खेलमा नेपाल काजकिस्तानसँग पनि ३–२ को सेटमा पराजित भएको थियो । लगातार दुई हारसँगै नेपालको सेमिफाइनल यात्रामा चुनौती थपिएको छ ।

नेपालले अब आफ्नो तेस्रो खेल शुक्रबार घरेलु टोली पाकिस्तानसँग खेल्नेछ । प्रतियोगितामा पाकिस्तान, नेपाल, काजकिस्तान, श्रीलङ्का, बङ्गलादेश र उज्बेकिस्तान सहभागी छन् । सिंगल राउन्ड रोबिन लिग चरणपछि शीर्ष चार टोलीले सेमिफाइनलमा स्थान बनाउनेछन् ।