अतिरिक्त समयमा अर्जेन्टिनाको नाटकीय जित, अन्तिम १६ मा इजिप्टसँग भिड्ने

काठमाडौं । साविक विश्वविजेता अर्जेन्टिनाले अतिरिक्त समयमा केप भर्डेलाई ३–२ ले पराजित गर्दै फिफा विश्वकप २०२६ को अन्तिम १६ मा स्थान सुरक्षित गरेको छ ।

राउन्ड अफ ३२ अन्तर्गत सम्पन्न रोमाञ्चक खेल निर्धारित ९० मिनेटसम्म १–१ को बराबरीमा टुंगिएपछि अतिरिक्त समयमा पुगेको थियो । अतिरिक्त समय पनि उत्तिकै प्रतिस्पर्धात्मक रह्यो, जहाँ दुवै टोलीले गोल गर्दै खेललाई थप रोमाञ्चक बनाए ।

अर्जेन्टिनाले २९औँ मिनेटमा कप्तान लियोनल मेसीको गोलमार्फत अग्रता लिएको थियो । तर ५९औँ मिनेटमा डेराए डुआर्टेले गोल गर्दै केप भर्डेलाई खेलमा फर्काए र निर्धारित समय १–१ को बराबरीमा समाप्त भयो ।

अतिरिक्त समयको दोस्रो मिनेट अर्थात् ९२औँ मिनेटमा लिसान्ड्रो मार्टिनेजले गोल गर्दै अर्जेन्टिनालाई पुनः अग्रता दिलाए । तर केप भर्डेले हार नमानी १०३औँ मिनेटमा सिड्नी लोपेज काब्रालको उत्कृष्ट गोलबाट पुनः २–२ को बराबरी कायम गर्‍यो ।

खेलको निर्णायक क्षण १११औँ मिनेटमा आयो । मेसीले प्रहार गरेको कर्नरमा क्रिस्टियन रोमेरोको हेडर केप भर्डेका डिनेको शरीरमा लागेर आफ्नै पोस्टमा छिर्दा अर्जेन्टिनाले ३–२ को अग्रता बनायो । यही गोल नै खेलको विजयी गोल सावित भयो ।

पहिलोपटक विश्वकप खेलिरहेको केप भर्डेले साविक विश्वविजेतालाई अन्तिम समयसम्म कडा चुनौती दिए पनि ऐतिहासिक नतिजा निकाल्न सकेन । उत्कृष्ट प्रदर्शनका बाबजुद उसको यात्रा अन्तिम ३२ बाटै टुंगिएको छ ।

यस जितसँगै अर्जेन्टिनाले प्रि–क्वार्टरफाइनलमा स्थान बनाएको छ, जहाँ उसले पहिलोपटक अन्तिम १६ पुगेको इजिप्टसँग प्रतिस्पर्धा गर्नेछ ।