एनपीएल दोस्रो संस्करणका लागि १५० खेलाडी अक्सनमा, आदिल ‘ए’ क्याटोगोरीमा

काठमाडौं । नेपाल प्रिमियर लिग (एनपीएल) को दोस्रो संस्करणका लागि १५० खेलाडी अक्सनमा सहभागी हुने भएका छन् । नेपाल क्रिकेट संघ (क्यान) ले बुधबार एक प्रेस विज्ञप्तिमार्फत खेलाडी छनोटको प्रक्रिया सार्वजनिक गरेको हो ।

क्यानका अनुसार प्रारम्भिक रूपमा ४५८ खेलाडीले नाम दर्ता गराएका थिए । तर, प्राविधिक समितिको मूल्यांकनपछि त्यसमध्ये १५० खेलाडी मात्रै अक्सन सूचीमा परेका हुन् ।

छनोटमा परेका खेलाडीहरू तीन क्याटोगोरीमा वर्गीकृत छन्— ‘ए’, ‘बी’ र ‘सी’ । क्याटोगोरी ‘ए’ मा ८ जना खेलाडी परेका छन्, जसमा मोहम्मद आदिल आलम, अर्जुन साउद, दिलिप नाथ, देव खनाल, पवन सर्राफ, शरद भेषावकर, सुर्य तामाङ र सुनम गौतम छन् ।

विवादास्पद रूपमा टी–२० लिगको स्पट फिक्सिङ प्रकरणमा प्रतिबन्ध खेपेका आदिल आलम पुनः अक्सनको ‘ए’ क्याटोगोरीमा समावेश भएका छन् । अदालतबाट सफाइ पाएपछि अन्तर्राष्ट्रिय क्रिकेट परिषद् (आइसीसी) ले पनि उनको प्रतिबन्ध हटाएको थियो ।

अन्य क्याटोगोरीअनुसार, ‘बी’ मा ३४ जना र ‘सी’ मा १०६ खेलाडी परेका छन् । यद्यपि, अक्सनमा सहभागी हुने १५० खेलाडीमध्ये ३७ जनामात्र बिक्रीमा पर्ने छन् ।

क्यानका अनुसार क्याटोगोरी ‘ए’ बाट ४, ‘बी’ बाट २३ र ‘सी’ बाट १० जना खेलाडीलाई फ्रेन्चाइजहरूले खरिद गर्न सक्नेछन् । यसअघि सम्बन्धित टोलीहरूले खेलाडी रिटेन तथा रिलिजको प्रक्रिया सकाइसकेका छन् ।

अक्सन मूल्यको सीमा पनि क्यानले निर्धारण गरेको छ । ‘ए’ क्याटोगोरीका खेलाडीका लागि न्यूनतम १० लाखदेखि अधिकतम १५ लाख रुपैयाँसम्म बोली लाग्न सक्नेछ । ‘बी’ क्याटोगोरीमा पर्ने खेलाडीको मूल्य ५ देखि १० लाखबीच रहनेछ भने ‘सी’ क्याटोगोरीका खेलाडीका लागि २ देखि ५ लाख रुपैयाँसम्मको बोली हुने बताइएको छ ।

खेलाडी अक्सन कार्यक्रम साउन २४ गते काठमाडौंमा आयोजना हुनेछ ।