सिभिल अस्पताल अगाडि जेनजीको प्रदर्शन, प्रधानमन्त्री ओलीको राजीनामाको माग

काठमाडौं । बानेश्वरस्थित सिभिल अस्पताल अगाडि भेला भएका जेनजी प्रदर्शनकारीले प्रधानमन्त्री केपी शर्मा ओलीको राजीनामा माग गरेका छन् ।

सोमबारको प्रहरी दमनमा साथीहरूको मृत्यु भएको घोषणा भएपछि मंगलबार अस्पतालको गेट अगाडि भेला भएका उनीहरूले “नालायक प्रधानमन्त्री राजीनामा दे”, “विद्यार्थी मार्न पाइँदैन” जस्ता नारा लगाउँदै राजीनामा माग गरेका हुन् ।

प्रदर्शनकारीहरूले गृहमन्त्री रमेश लेखकको मात्र राजीनामाले नपुग्ने स्पष्ट पारेका छन् । उनीहरूले प्रहरी प्रशासनविरुद्ध पनि नाराबाजी गरेका छन् ।

मंगलबार बिहानैदेखि प्रशासनले कर्फ्यू लगाए पनि कडा सुरक्षाबीच जेनजी प्रदर्शनकारी सडकमा निस्किएका छन् । नयाँ बानेश्वरदेखि शंखमुल जाने बाटोमा भेला भएका उनीहरूले समेत प्रधानमन्त्री ओलीको राजीनामा माग्दै विद्यार्थीको रगतको जिम्मेवारी प्रधानमन्त्रीले लिनुपर्ने बताएका छन् ।

सोमबार भएको प्रदर्शनमा प्रहरी दमनका कारण कम्तीमा १९ जना युवाको मृत्यु भएको र ४०० सयभन्दा बढी घाइते भएको जनाएको छ ।